पटना। राजधानी पटना के मुसल्लहपुर हाट इस्थित खान ग्लोबल स्टडीज में 2 जून के रात भइल हंगामा आ फायरिंग ममिला में फैजल खान उर्फ खान सर के फेर कोर्ट से राहत मिल गइल बा। पटना सिविल कोर्ट सनिचर के सुनवाई करत खान सर के गिरफ्तारी पs लागल रोक के अगिला आदेस तक जारी रखे के निरदेस देले बा। अब एह ममिला के अगिला सुनवाई 25 जून के होई।
तीन स्टाफ के मिलल राहत
कोर्ट खान सर के तीन गो स्टाफ के नो कोर्सिव ऑर्डर देले बा। मतलब ई लोग के फिलहाल गिरफ्तार ना कइल जा सकेला। ओहिजा, खान सर के दुनो सुरक्षा गार्ड के याचिका पs सुनवाई करत कोर्ट 25 जून तक न्यायिक हिरासत बरकरार रखे के आदेस देले बा। दुनो गार्ड के जमानत याचिका पs 25 जून के सुनवाई होई।
पुलिस कोर्ट में पेस कइलस अपडेटेड केस डायरी
सुनवाई के दौरान पुलिस कोर्ट में अपडेटेड केस डायरी पेश कइलस। बतावल जा रहल बा कि केस डायरी में ई बात के जिकिर बा कि दहशत फइलावे खातिर फायरिंग कइल गइल रहे। दुनो पक्ष के दलील सुनला के बाद कोर्ट फिलहाल खान सर के गिरफ्तारी पs अंतरिम सुरक्षा बरकरार रखले बा।
बतावत चलीं कि 2 जून के रात कोचिंग संस्थान के बाहर भइल हंगामा के दौरान खान सर के दुनो सुरक्षा गार्ड पs फायरिंग करे के आरोप लागल रहे। शिकायतकर्ता के आरोप बा कि ई कार्रवाई खान सर के निरदेस पs कइल गइल। एकरा बाद पुलिस दर्ज एफआईआर में फैजल खान के नाम जोड़ देले रहे।
एह ममिला में आरोपित बनावल गइल ज्ञान बिंदु जीएस एकेडमी के निदेशक रौशन आनंद के पहिले गिरफ्तार कइल गइल रहे। बाद में कोर्ट से जमानत मिलला के बाद ऊ जेल से बाहर आ गइल बाड़ें।
रौशन आनंद के भाई के मौत के बाद बढ़ल विवाद
एह ममिला में नया मोड़ तब आइल जब रौशन आनंद के भाई के नेपाल के एगो होटल में संदिग्ध परिस्थिति में मौत हो गइल। रौशन आनंद सार्वजनिक रूप से एह घटना खातिर फैजल खान पs हत्या के आरोप लगवलें। एकरा बाद कदमकुआं थाना में प्राथमिकी दर्ज करवला के मुद्दा पs विवाद बढ़ गइल।
रौशन आनंद आरोप लगवलें कि पुलिस उनकर शिकायत दर्ज ना कइलस। एह विरोध में ऊ धरना देले रहस। रौशन आनंद लगातार आरोप लगावत बाड़ें कि एह ममिला में उनका संगे भेदभावपूर्ण रवैया अपनावल गइल।
उनकर कहनाम बा कि जवना ममिला में उनकर गिरफ्तारी जल्दी हो गइल, ओही ममिला में नामजद होखला के बादो खान सर के खिलाफ पुलिस अब तक कवनो कड़ा कार्रवाई नइखे कइले।
