चाईबासा। सरायकेला-खरसावां जिला के राजनगर-चाईबासा मुख्य सड़क (NH-220) पs सोमार के देर रात भइल भीषण सड़क हादसा में दूगो चालकन के जिंदा जरके मौत हो गइल, जबकि दोसर दूगो चालक घायल हो गइल लोग। ई हादसा रात करीब 12:30 बजे रोला-खैरबनी मोड़ के लगे भइल।
डंपर आ ट्रेलर के आमने-सामने टक्कर
मिलल जानकारी के मोताबिक, डंपर आ ट्रेलर के आमने-सामने जोरदार टक्कर हो गइल। टक्कर एतना जबरदस्त रहे कि दुनु गाड़ी में तुरंत भीषण आग लाग गइल। आग बहुत तेजी से फइलल, जवना में दुनु चालक फंस गइलें।
ट्रेलर चालक के घटनास्थल पs जिंदा जरके मौत हो गइल, जबकि गंभीर रूप से झुलसल डंपर चालक के इलाज खातिर चाईबासा सदर अस्पताल ले जाइल गइल, जहां डॉक्टर लोग उनका के मृत घोषित कर दिहल।
पीछे से आवत दू ट्रेलरो दुर्घटना के शिकार
हादसा के बाद पीछे से आवत दूगो आउर ट्रेलर अनियंत्रित हो गइल आ आपस में टकरा गइल। टक्कर के बाद दुनु ट्रेलर सड़क किनारे खेत में पलट गइल। एह दुर्घटना में दुनु चालक घायल हो गइल लोग। घायल चालकन के अस्पताल में भरती करा के इलाज करावल जा रहल बा। एह तरे कुछे मिनट में चार गो भारी वाहन एह भीषण हादसा के चपेट में आ गइल।
दू घंटा बाद आग पर मिलल काबू
घटना के सूचना मिलतही राजनगर थाना पुलिस आ दमकल विभाग के कइयन गो गाड़ी घटनास्थल पs पहुंच गइल। आग एतना भीषण रहे कि ओकरा पs काबू पावे में करीब दू घंटा लाग गइल। तब तक डंपर आ ट्रेलर पूरा तरे जरके राख हो चुकल रहे।
पुलिस दुनु मृत चालकन के शव कब्जा में लेके पोस्टमार्टम खातिर भेज देले बिया आ हादसा के असली कारण के जांच सुरू कs देले बिया।
फोरलेन सड़क बनावे के मांग फेर तेज
एह दर्दनाक हादसा के बाद स्थानीय लोगन में भारी नाराजगी देखे के मिलल। ग्रामीण लोग फेर से राजनगर-चाईबासा NH-220 के फोरलेन बनावे के मांग उठवले बिया।
स्थानीय लोगन के कहनाम बा कि सड़क संकरा होखे आ भारी वाहनन के लगातार आवाजाही के चलते एह मार्ग पs अक्सर गंभीर सड़क हादसा होत रहेला। लोग केंद्र आ राज्य सरकार से जल्द से जल्द सड़क के चौड़ीकरण करावे के मांग कइले बा, ताकि भविष्य में अइसन दर्दनाक दुर्घटना पs रोक लगावल जा सके।
