रांची। झारखंड में भर्ती परीक्षा के लेके चल रहल छात्र आंदोलन के बीच सरकार एगो बड़ फैसला लेले बिया। सरकार मंगर के रात 44 भर्ती परीक्षा रद्द करे के सूची जारी कइलस। सरकार के मोताबिक, कथित अनियमितता आ विवादित परीक्षा एजेंसी के भूमिका के चलते एह परीक्षन के रद्द कइल गइल बा।
सरकार एह संबंध में कुल आठ अलग-अलग अधिसूचना जारी कइले बिया। एह सूची में झारखंड लोक सेवा आयोग (JPSC), झारखंड कर्मचारी चयन आयोग (JSSC) आ आउटसोर्सिंग एजेंसी टीडीपीएल (TSR Data Processing Pvt Ltd) से जुड़ल कइयन गो परीक्षा सामिल बाड़ी सs।
44 भर्ती परीक्षा रद्द
सरकारी सूची के मोताबिक, साल 2014 के बाद आयोजित कइयन गो भर्ती परीक्षा के समीक्षा के बाद कार्रवाई कइल गइल बा। एमे गैर-शैक्षणिक पद, वैज्ञानिक अधिकारी, मेडिकल कॉलेज, सिविल सेवा, वन सेवा आ अभियोजन से जुड़ल परीक्षा सामिल बाड़ी सs।
JPSC आ TDPL के माध्यम से आयोजित परीक्षा
रद्द कइल गइल प्रमुख परीक्षा में झारखंड के विश्वविद्यालयन में गैर-शैक्षणिक पद पs भर्ती के परीक्षा सामिल बा। एकरा अलावे सहायक निदेशक/वरिष्ठ वैज्ञानिक अधिकारी के बैकलॉग आ नियमित भर्ती, औषधि निरीक्षक भर्ती आ सरकारी इंजीनियरिंग कॉलेज में सहायक प्राध्यापक भर्ती परीक्षा रद्द कइल गइल बा।
सरकार के सूची में सरकारी पॉलिटेक्निक आ महिला पॉलिटेक्निक में व्याख्याता के बैकलॉग आ नियमित भर्ती के परीक्षा आउर मेडिकल कॉलेज के सुपर स्पेशलिस्ट पद पs सहायक प्राध्यापक भर्ती सामिल बा।
सिविल सेवा आ न्यायिक भर्ती परीक्षा रद्द
रद्द परीक्षा के दूसरका सूची में सिविल जज जूनियर डिवीजन भर्ती, सहायक वन संरक्षक, वन क्षेत्र पदाधिकारी आ सहायक लोक अभियोजक के भर्ती परीक्षा सामिल बा।
एकरा अलावे झारखंड संयुक्त सिविल सेवा परीक्षा-2025, संयुक्त सिविल सेवा परीक्षा बैकलॉग-2025 आ बैकलॉग-2023 के परीक्षा रद्द कइल गइल बा।
खाद्य सुरक्षा अधिकारी आ CDPO परीक्षा रद्द
TDPL के माध्यम से संपादित कुछ आउर JPSC परीक्षा पs सरकार कार्रवाई कइले बिया। एमे खाद्य सुरक्षा अधिकारी भर्ती, बाल विकास परियोजना अधिकारी (CDPO) भर्ती आ संयुक्त सिविल सेवा परीक्षा-2023 सामिल बा। सरकार के फैसला के बाद अब एह परीक्षा में सामिल अभ्यर्थियन के आगे के प्रक्रिया के इंतजार बा।
विवादित एजेंसी के भूमिका पs कार्रवाई
सरकार के अधिसूचना में TDPL सहित कुछ आउर विवादित एजेंसी के भागीदारी से जुड़ल परीक्षा के जिकिर बा। एह श्रेणी में छठी सीमित उप-समाहर्ता भर्ती परीक्षा आ झारखंड पात्रता परीक्षा (JET) 2024 के रद्द कइल गइल बा।
JSSC CGL परीक्षा रद्द
सरकार के जारी सूची में JSSC सामान्य स्नातक योग्यताधारी संयुक्त प्रतियोगिता परीक्षा (CGL), विज्ञापन संख्या 10/2023 सामिल बा। एह फैसला के बाद JSSC CGL सहित कइयन गो भरती परीक्षा के अभ्यर्थियन के बीच एक बेर फेर परीक्षा प्रक्रिया आ नियुक्ति के भविष्य के लेके सवाल उठे लागल बा।
छव परीक्षा रद्द ना, अगिला आदेस तक स्थगित
सरकार साफ कइले बिया कि कुछ परीक्षा के रद्द नइखे कइल गइल बा, बलुक अगिला आदेस तक स्थगित रखल गइल बा। एमे फूड एनालिस्ट (05/2024), उप निदेशक अभियोजन (03/2025), प्रोजेक्ट मैनेजर (04/2025), कारखाना निरीक्षक (01/2025), बॉयलर निरीक्षक (02/2025) आ निदेशक (07/2025) के परीक्षा सामिल बा।
एजेंसी से जुड़ल ममिला के जांच CID के सउपल गइल बा। जांच पूरा होखला के बाद एह परीक्षा पs आगे के फैसला लिहल जा सकेला।
17 पुरान परीक्षा CID जांच के दायरा में
सरकार के अधिसूचना 5406 के मोताबिक, कइयन गो पुरान परीक्षा के CID जांच के दायरा में ले आवल गइल बा। एमे 5वीं सिविल सेवा, 2016 सिविल सेवा, 2021 सिविल सेवा, असिस्टेंट इंजीनियर आ सिविल जज सहित कुल 17 पुरान परीक्षा सामिल बतावल गइल बा।
झारखंड भर्ती परीक्षा पs सरकार के फैसला से का असर पड़ी?
44 भर्ती परीक्षा रद्द होखला के बाद हजारन अभ्यर्थियन के भविष्य पs असर पड़ सकेला। अब अभ्यर्थियन के नजर सरकार आ संबंधित आयोग के अगिला आदेस पs बा। खास तौर पs रद्द परीक्षा के नया प्रक्रिया, नया विज्ञापन आ दोबारा परीक्षा के तारीख के इंतजार कइल जा रहल बा।
Read Also: 19 अगस्त 2026 के राशिफल
