गोरखपुर : डीएवी पीजी कॉलेज, गोरखपुर में मंगर के राष्ट्रीय सेवा योजना (NSS) दयानंद इकाई के तत्वावधान में अंतरराष्ट्रीय युवा दिवस पs हर घर तिरंगा कार्यक्रम के आयोजन कइल गइल। कार्यक्रम के नेतृत्व प्राचार्य प्रो. शैल पांडे आ कार्यक्रम अधिकारी प्रतिभा गुप्ता कइल लो।
एह अवसर पs पोस्टर प्रतियोगिता आ रंगोली प्रतियोगिता के आयोजन भइल। दीनदयाल उपाध्याय गोरखपुर विश्वविद्यालय के इतिहास विभाग के सहायक आचार्य डॉ. आशीष कुमार सिंह के देखरेख में रंगोली प्रतियोगिता में पहिला पुरस्कार शीतल टीम, द्वितीय पुरस्कार नाजिया टीम आ तृतीय पुरस्कार मरियम टीम के मिलल। पोस्टर प्रतियोगिता में दृष्टि गुप्ता पहिला, मरियम फातिमा द्वितीय आ श्रद्धा श्रीवास्तव तीसरा स्थान हासिल कइलें।
डॉ. आशीष कुमार सिंह सब प्रतिभागियन के बधाई देत कहलें कि भारतीय राष्ट्रीय ध्वज (तिरंगा) देस के एकता, अखंडता आ स्वतंत्रता के प्रतीक हs। ई खाली एगो ध्वज ना, बलुक भारत के इतिहास, संस्कृति आ बलिदानन के प्रतिनिधित्व करेला।
कार्यक्रम में राष्ट्रीय सेवा योजना के सक्रिय स्वयंसेवक अंकुर कुमार मिश्रा आ स्वयंसेविका आकांक्षा राय MY BHARAT पोर्टल के माध्यम से NSS के अलग-अलग गतिविधियन आ भविष्य के अवसरन के बारे में जानकारी दिहल।
एह अवसर पs डॉ. मनोज कुमार श्रीवास्तव, डॉ. संजय कुमार पांडे, डॉ. रागिनी दीक्षित सहित सब शिक्षकगण, रूपा, मुस्कान, प्रिया, आयुष मिश्रा आ आउर स्वयंसेवक आ स्वयंसेविका उपस्थित रहे लो।
