महाराष्ट्र के ठाणे जिला में कैब चालक के हत्या के मामला सोझा आईल बा। एs मामला में पुलिस के पता चलल बा कि इs घटना संपत्ति के विवाद के चलते भईल बा। बुध के एकरा बारे में जानकारी देत अधिकारी बतवले कि पुलिस हत्या के मामला में मरेवाला के प्रेमिका अवुरी 4 लोग के गिरफ्तार कs लेले बिया। बता दीं कि महाराष्ट्र के ठाणे जिला के भिवंडी इलाका के मौजे पोगांव में 17 जनवरी के 22 साल के अकरम इकबालुद्दीन कुरैशी पs लोहा के छड़ी आ पत्थर से हमला भइल रहे.
झाड़ी में कैब चालक के शव मिलल
कैब चालक कुरैशी के शव 18 जनवरी के पाइप लाइन के लगे झाड़ी में मिलल रहे। एसएसपी दादासो एडके बतवले कि एकरा बाद भिवंडी तालुका पुलिस अज्ञात लोग के खिलाफ हत्या के मामला दर्ज कs लेले बिया। अदके के मुताबिक मामला के जांच खातीर दु पुलिस टीम बनावल गईल। उs बतवले कि जांच अधिकारी अपराध स्थल के नजदीक लगावल सीसीटीवी कैमरा के फुटेज के जांच कईले, जवना में कुरैशी एगो महिला के संगे आवत देखाई देले। एडके के मुताबिक, कुरैशी के मोबाइल फोन के डाटा के तकनीकी विश्लेषण के बाद पुलिस पछिला महीना उनुकर प्रेमिका जस्सी तिवारी (20) के हिरासत में लेले रहे।
