मथुरा में प्रेमिका के खातिर एगो प्रेमी 25 बाइक चोरा लिहलस। पुलिस आ स्वाट टीम ओकरा के गिरफ्तार कs लेलस। आरोपी बतवलख कि ओकरा लगे बाइक ना रहे, जवना के चलते ओकर प्रेमिका ओकरा के छोड़ के चल गइल रहली।
मथुरा के वृंदावन थाना के पुलिस आ स्वाट टीम मंगलवार के एगो शातिर वाहन चोर के गिरफ्तार कs लेले बिया। ओकरा लगे से 25 चोरी के बाइक बरामद भइल बा।
पुलिस पूछताछ के दौरान सोझा आइल बा कि ओकर एगो प्रेमिका रहे आ ओकरा लगे ओकरा के घुमावे खातीर बाइक ना रहे। एही पर ओकर प्रेमिका ओकरा के छोड़ के चल गइल। तनाव में पहिले नशा के लत लाग गइल आ फेर लोग के बाइक चोरी करे लागल। प्रेमिका के दिखावे खातिर ऊ रोज बाइक बदल के ओकरा सोझा जात रहे। बढ़िया पईसा मिलला के बाद ऊ अलीगढ़-हथरस के ग्रामीण इलाका के लोग के बाइक बेचत रहे।
इंस्पेक्टर रवि त्यागी बतवले कि हाल ही में वृंदावन से दु बाइक चोरी भइल बा। पुलिस ओ लोग के खोज में व्यस्त रहे। जांच के दौरान पीरीगढ़ी, राया निवासी राहुल सिंह के नाम सामने आइल। मंगलवार के कान्हा मखान जाए के रास्ता में रुक्मिणी विहार गोल चक्कर के नजदीक ओकर लोकेशन मिलल।
एकरा पs स्वाट टीम के प्रभारी अभय कुमार शर्मा के मदद से उहाँ से पकड़ा गइल। पूछताछ में ऊ गाड़ी चोरी के घटना करे के बात कबूल कइलख । आरोपी के लगे से बरामद बाइक अलीगढ़, मथुरा, हाथरस, हरियाणा नंबर के बा। पुलिस आरोपी के जेल भेज देले बिया। गिरफ्तारी आ बरामदगी में 20 पुलिसकर्मी के टीम शामिल रहे।
