स्पोर्ट्स डेस्क। भारत बनाम अफगानिस्तान टी20 सीरीज के लेके एगो दिलचस्प खबर सामने आइल बा। सितंबर महीना में होखे वाला तीन मैचन के टी20 सीरीज भारते में खेलल जाई, बाकिर एह सीरीज के मेजबानी टीम इंडिया ना, बलुक अफगानिस्तान करी। मतलब भारतीय टीम अपने देस में मेहमान टीम के रूप में मैदान पs उतरी।
रिपोर्ट के मोताबिक, ई मुकाबला दिल्ली के अरुण जेटली स्टेडियम में खेलल जाई। हालांकि, एह सीरीज के शेड्यूल पs अभी तक आधिकारिक मुहर नइखे लागल।
दिल्ली में खेलल जाई तीन टी20 मुकाबला
मीडिया रिपोर्ट के अनुसार, 13 सितंबर, 15 सितंबर आ 17 सितंबर के भारत आ अफगानिस्तान के बीच तीन टी20 मैच खेलल जाई। सब मुकाबला अरुण जेटली स्टेडियम, नई दिल्ली में आयोजित होखे के संभावना बा।
चूंकि अफगानिस्तान क्रिकेट बोर्ड के घरेलू मैदान के मान्यता भारत में बा, एह चलते ई सीरीज भारत में होखला के बावजूद मेजबान अफगानिस्तान रही।
श्रीलंका टेस्ट सीरीज के बाद होई मुकाबला
भारत के एह टी20 सीरीज से पहिले श्रीलंका के खिलाफ दू मैच के टेस्ट सीरीज खेले के बा। एह सीरीज के दूसरका टेस्ट 27 अगस्त के खतम होई। ओकरा बाद भारतीय टीम सितंबर में अफगानिस्तान से भिड़ी।एह साल के आखिर में भारतीय टीम एशियाई खेलन में हिस्सा ली, जवना के सुरुआत 24 सितंबर से होखे वाला बा।
हाले में वनडे आ टेस्ट सीरीज खेलल गइल रहे
भारत आ अफगानिस्तान के बीच हाले में तीन मैच के वनडे सीरीज आ एगो टेस्ट मैच खेलल गइल रहे। अब दूनों टीम टी20 फॉर्मेट में आमने-सामने होखे जा रहल बाड़ी सs। वर्तमान में भारतीय टीम जिम्बाब्वे के खिलाफ तीन मैच के टी20 सीरीज खेल रहल बिया आ पहिला मुकाबला जीतके सानदार सुरुआत कइले बा।
टी20 में मजबूत बा अफगानिस्तान
अफगानिस्तान के टीम टी20 क्रिकेट में दुनिया के मजबूत टीमन में गिनल जाले। टी20 वर्ल्ड कप के बाद टीम अब आपन पहिला टी20 सीरीज भारत के खिलाफ खेली। अफगानिस्तान के कइयन गो खिलाड़ी आईपीएल में लगातार खेलत आइल बा लो। एह कारण भारत के मैदान, पिच आ मौसम के उनका अच्छा अनुभव बा, जवन भारतीय टीम खातिर चुनौती बन सकेला।
रोमांचक मुकाबला के उम्मीद
भारत आ अफगानिस्तान के बीच ई टी20 सीरीज क्रिकेट प्रेमियन खातिर बहुते रोमांचक होखे के उम्मीद बा। अपना घर में मेहमान बनके खेले उतर रहल टीम इंडिया आ मेजबान अफगानिस्तान के बीच मुकाबला फैंस खातिर खास आकर्षण के केंद्र रही।
