बिजनेस डेस्क। भारतीय शेयर बाजार 29 जुलाई के जोरदार तेजी के संगे बंद भइल। IT, मेटल, बैंकिंग आ FMCG शेयरन में मजबूत खरीदारी से निवेशकन के भरोसा बढ़ल। कारोबार के आखिर में सेंसेक्स 888.68 अंक माने 1.16 प्रतिशत चढ़के 77,654.60 अंक पs बंद भइल।
ओहिजा, निफ्टी 50 इंडेक्स 264.85 अंक माने 1.10 प्रतिशत के बढ़त के संगे 24,250.20 अंक पs बंद भइल। निफ्टी 24,200 के महत्वपूर्ण स्तर के ऊपर बंद होखला से बाजार के मजबूत रुख देखे के मिलल।BSE पs कुल 4,424 शेयरन में कारोबार भइल। एमे 2,591 शेयर तेजी के संगे बंद भइलें, जबकि 1,652 शेयरन में गिरावट दर्ज भइल। बाकी 181 शेयर के भाव में कवनो बदलाव ना देखे के मिलल।
एह शेयरन में सबसे जादे तेजी रहल
निफ्टी 50 के शेयरन में जियो फाइनेंशियल सर्विसेज, हिंदुस्तान यूनिलीवर, इंफोसिस, हिंडाल्को इंडस्ट्रीज आ लार्सन एंड टुब्रो (L&T) सबसे जादे फायदा वाला शेयर रहल। IT कंपनी इंफोसिस में मजबूत खरीदारी देखे के मिलल। मेटल सेक्टर के हिंडाल्को के शेयर में तेजी रहल। FMCG सेक्टर के हिंदुस्तान यूनिलीवर के प्रदर्शन से बाजार के मजबूती मिलल।
एह शेयरन में दर्ज भइल गिरावट
बाजार में चौतरफा खरीदारी के बादाे कुछ प्रमुख शेयर गिरावट के संगे बंद भइल। अदाणी पोर्ट्स एंड SEZ, महिंद्रा एंड महिंद्रा (M&M), पावर ग्रिड कॉर्पोरेशन, आयशर मोटर्स आ HDFC लाइफ इंश्योरेंस निफ्टी 50 के सबसे जादे नुकसान उठावे वाला शेयर रहलें।
IT आ मेटल सहित कइयन गो सेक्टरन में तेजी
सेक्टर के हिसाब से देखल जावs तs रियल्टी इंडेक्स के छोड़के लगभग सब प्रमुख सेक्टर बढ़त के संगे बंद भइलें। IT, मीडिया, मेटल, फार्मा, टेलीकॉम, प्राइवेट बैंक, FMCG आ कंज्यूमर ड्यूरेबल्स इंडेक्स में लगभग 1 से 2 प्रतिशत तक के तेजी दर्ज भइल। निफ्टी मिडकैप 100 इंडेक्स 0.8 प्रतिशत चढ़ल, जबकि निफ्टी स्मॉलकैप 100 इंडेक्स में 1.5 प्रतिशत के मजबूत बढ़त देखे के मिलल।
AI शेयर से IT सर्विस कंपनी के ओर बढ़ल निवेशकन के रुझान
भारतीय IT शेयरन में तेजी के पीछे निवेशकन के बदलत पसंद के असर देखे के मिलल। दुनियाभर में AI इंफ्रास्ट्रक्चर कंपनी के शेयरन में हाल के गिरावट के बाद निवेशक अब IT सर्विस कंपनी के ओर रुख करत नजर आ रहल बा।
बाजार विशेषज्ञन के मोताबिक, IT सर्विस कंपनी आकर्षक वैल्यूएशन आ बेहतर फ्री कैश फ्लो यील्ड (FCF Yield) उपलब्ध करा रहल बाड़ी सs। एह कारण निवेशकन के रुचि IT शेयरन में बढ़ल बा। कुल मिलाके, 29 जुलाई के शेयर बाजार में मजबूत खरीदारी से सेंसेक्स आ निफ्टी दुनो के जोरदार बढ़त मिलल। IT, मेटल, बैंकिंग आ FMCG शेयरन के तेजी बाजार के सकारात्मक माहौल के संकेत दे रहल बा।
Read Also: Bihar TRE-4 : बिहार में 32,388 शिक्षकन के होई भरती, शिक्षा विभाग बीपीएससी के भेजलस अधियाचना
