नई दिल्ली। महाराष्ट्र के पुणे में छत्रपति शिवाजी जयंती के मवका पs छत्रपति शिवाजी महाराज के जन्मस्थान शिवनेरी किला में बहुत जादे भीड़ जमा होखला पs भगदड़ जइसन इस्थिति बन गइल। एह हादसा में 3 लोग घायल हो गइल बा।
भक्त, शिव ज्योति (औपचारिक आग) लेके नवहन के ग्रुप आ पूरा महाराष्ट्र से अलग-अलग संगठनन के सदस्य देर रात किला में जमा हो गइल रहे लोग। एह वजह से, मुख्य समारोह से बहुत पहिलही किला परिसर खचाखच भर गइल रहे। बढ़त भीड़ के संभारे खातिर पुलिस के कमी के कारण, कुछ समय खातिर इस्थिति तनावपूर्ण हो गइल।
एकरा बाद अंबरखाना इलाका के नीचे संकरा जगहन, खास कs के हाथी दरवाजा आ गणेश दरवाजा के एंट्रेंस के आसपास बड़ भीड़ के खबर मिलल रहे। बड़ संख्या में लोगन के एक संगे आगे बढ़े के कोसिस करे से रस्ता बहुत भीड़भाड़ वाला हो गइल, जवना से अफरा-तफरी मच गइल आ भगदड़ जइसन इस्थिति बन गइल।
एह भगदड़ में महिला आ छोट लईकन सहित कइयन लोग घायल हो गइल। घायलन के तुरंत जुन्नार के सरकारी अस्पताल ले जाइल गइल।
पुलिस का कहलस?
पुणे ग्रामीण SP संदीप सिंह गिल कहलें, “जदि रउआ इहां जुन्नार में शिवनेरी किला के ऊपर शिवाजी के जन्मस्थान के देखल जावs, तs काल्ह सबेरही से बड़ संख्या में लोग दर्शन खातिर आ रहल बा और रात भर दर्शन होत रहे…एगो भक्त फिसल गइल आ एह वजह से आउर लोग सीढ़ियन पs गिर गइल आ ओमे से तीन लोग घायल हो गइल। कवनो भगदड़ ना भइल।”
Read Also: Up Road Accident : औरैया में नहर में गिरल कार, महिला सहित तीन लोग के डूबला से मौत
