रांची। झारखंड राज्यसभा चुनाव के दूगो सीट खातिर नामांकन पत्र के जांच पूरा होखला के बाद निर्दलीय उम्मीदवार परिमल नाथवानी के उम्मेदवारी के मंजूरी मिल गइल बा। उनका नामांकन पत्र पs कथित रूप से तीन बिंदु पs आपत्ति दर्ज करावल गइल रहे, जवना के चलते विधानसभा प्रभारी सचिव आ रिटर्निंग ऑफिसर रंजीत कुमार सुरुआती दौर में उनकर नामांकन होल्ड पs रखले रहलें।
स्पष्टीकरण के बाद मिलल राहत
बाद में रिटर्निंग ऑफिसर परिमल नाथवानी से संबंधित आपत्तियन पs जवाब मंगवलें। नाथवानी के ओर से दिहल गइल स्पष्टीकरण से अधिकारी संतुष्ट हो गइलें, जवना के बाद उनका नामांकन पत्र के वैध घोषित कs दिहल गइल। एह दौरान कांग्रेस के ओर से उठावल गइल सब आपत्तियन के खारिज कs दिहल गइल।
अब मैदान में तीन उम्मीदवार
नामांकन प्रक्रिया के बाद अब चुनावी मैदान में तीन प्रमुख उम्मीदवार बचल बा लोग-
- झामुमो उम्मीदवार बैद्यनाथ राम
- कांग्रेस उम्मीदवार प्रणव झा
- भाजपा समर्थित निर्दलीय उम्मीदवार परिमल नाथवानी
एह तीनो के बीच राज्यसभा के दू सीट खातिर मुकाबला होई।
विधानसभा के गणित का कहत बा?
जदि विधानसभा के मवजूदा संख्या बल पs नजर डालल जावs, तs सत्तारूढ़ गठबंधन के लगे कुल 56 विधायक बा लोग। एह आधार पs गठबंधन दूनो सीट जीते के मजबूत स्थिति में लउकत बा।
हालांकि, परिमल नाथवानी के चुनाव मैदान में उतरला के बाद मुकाबला दिलचस्प हो गइल बा। राजनीतिक गलियारा में क्रॉस वोटिंग के संभावना पs चरचा तेज हो गइल बा।
नाथवानी खातिर आसान नइखे राह
एनडीए गठबंधन के लगे फिलहाल 24 विधायक बा लोग। एह इस्थिति में परिमल नाथवानी के जीत सुनिश्चित करे खातिर अतिरिक्त वोट के जरूरत पड़ी। राजनीतिक जानकारन के माने के बा कि चुनाव के नतीजा काफी हद तक प्राथमिकता वोट आ अलग-अलग दलन के विधायकन के रणनीति पs निर्भर करी।
नतीजा पs टिकल बा सब केहू के नजर
राजनीतिक हलकन में कइयन तरे के अटकल लगावल जा रहल बा, बाकिर विधायकन के खरीद-फरोख्त भा हार्स ट्रेडिंग से जुड़ल कवनो दावा के अभी तक आधिकारिक पुष्टि नइखे भइल। फिलहाल ई सब चरचा राजनीतिक बहस तक सीमित बा।
अब सब केहू के नजर मतदान के दिन विधायकन के रुख आ चुनाव परिणाम पs टिकल बा, जवना से साफ हो जाई कि राज्यसभा के दूनो सीट आखिरकार केकरा झोली में जाई।
