लातेहार। झारखंड के लातेहार जिला में माओवादियन के बीच भइल एगो विवाद के चलते कुख्यात माओवादी कमांडर छोटू खरवार के हत्या कs दिहल गइल बा। ई घटना जिला के छिपादोहर थाना क्षेत्र के भीमपांव जंगल के लगे भइल। पलामू के डीआईजी वाई एस रमेश एह हत्या के पुष्टि कइले बाड़ें। ऊ बतवलें कि ई हत्या माओवादियन के आपसी विवाद के कारण भइल बा। हालांकि, पुलिस ममिला के जांच कs रहल बिया आ हत्याकांड के कारणन के स्पष्ट रूप से पता जांच के बादे चल सकी।
भीमगांव जंगल के घटना
मीडिया रिपोर्ट्स के अनुसार, कुछ दिनन से माओवादियन के बीच आपसी मतभेद आ रंजिश चलत रहे। मंगर रात के माओवादी समूह भीमपांव जंगल में इकट्ठा भइल रहे, जहां एगो समझौता कइल जात रहे। एह बैठक के दौरान विवाद एतना बढ़ गइल कि माओवादी एक-दूसरा से भिड़ गइल। एह दौरान, एगो माओवादी छोटू खरवार के गोली मारके हत्या कs देलस। घटना के बाद, माओवादी शव के जंगल में छोड़ देलें सs आ मवका से फरार हो गइलें सs।
पलामू के डीआईजी वाई एस रमेश एह हत्या के पुष्टि करत बतवलें कि मृतक के शव के जंगल से बरामद कइल गइल बा आ ई शव माओवादी कमांडर छोटू खरवार के हs। पुलिस ममिला के गहन जांच कs रहल बिया आ जल्दिये एह हत्या के पीछे के कारणन के खुलासा कइल जाई।
छोटू खरवार के कुख्यात इतिहास
छोटू खरवार के नाम इलाका में दहशत पैदा करत रहे। ऊ माओवादी संगठन के एगो बड़ नेता रहे आ ओकरा माथा पs 15 लाख रुपिया के इनाम घोषित रहे। खरवार के खिलाफ लातेहार आ आसपास के कइयन जिलन के थाना क्षेत्रन में नक्सली हिंसा के दर्जनन ममिला दर्ज रहे। ओकर माओवादियन के संगठन में महत्वपूर्ण भूमिका रहे आ ओकर गतिविधि इलाका में खौफ फइलावत रहे।
इहों पढ़ी: हरियर निशान पs खुलल शेयर बाजार, अदाणी समूह के बयान के बाद सेंसेक्स आ निफ्टी में उछाल
पुलिस बतवलस कि छोटू खरवार माओवादियन के सबसे प्रभावशाली लीडर रहे आ ओकरा हत्या से संगठन में एगो बड़ संकट आ सकत बा। एकरा बादो, पुलिस एह हत्या के ममिलन के पूरा जांच कs रहल बिया आ जल्दिये एह ममिला से जुड़ल आउर जानकारियां सामने अइला के उम्मेद बा।
पुलिस के जांच आ आवे वाला डेग
पलामू डीआईजी वाई एस रमेश कहलें कि पुलिस घटना के तह तक जाये खातिर पूरा तरे प्रतिबद्ध बिया। ऊ इहो बतवलें कि माओवादी संगठन में बढ़त आपसी रंजिश आ विवाद के कारण एह हत्या के ममिला सामने आइल बा। पुलिस टीम अब मृतक के शव के बरामदगी, घटनास्थल से जुटावाल गइल जानकारी आ माओवादी समूह के आउर सदस्यन से पूछताछ कs के ममिला के जांच के आगे बढ़ाई।
एह घटना के बाद इलाका में सुरक्षा बढ़ा दिहल गइल बा, ताकि माओवादियन के कवनो तरे हमला भा आउर गतिविधियन के रोकल जा सके। पुलिस इहो कहलस कि माओवादी कमांडर छोटू खरवार के हत्या से माओवादी संगठन में असंतोष बढ़ सकत बा आ एसे इलाका में तनाव उत्पन्न हो सकत बा।
