स्पोर्ट्स डेस्क। भारत आ जिम्बाब्वे के बीच खेलल जा रहल तीन मैचन के टी20 सीरीज के दूसरका मुकाबला 25 जुलाई के हरारे स्पोर्ट्स क्लब में खेलल जाई। पहिलका टी20 में टीम इंडिया सानदार प्रदर्शन करत सात विकेट से आसान जीत दर्ज कइले रहे। अब सब क्रिकेट प्रेमियन के नजर दूसरका मुकाबला के पिच रिपोर्ट पs टिकल बा कि एह मैच में बल्लेबाजन के बोलबाला रही कि गेंदबाज फेर कमाल देखाई लो।
हरारे स्पोर्ट्स क्लब के पिच पहिलका टी20 में तेज गेंदबाजन के भरपूर मदद कइले रहे। सुरुआती ओवरन में पिच पs नमी रहे, जवना के चलते गेना बढ़िया स्विंग भइल आ अतिरिक्त उछालो मिलल। एह कारण जिम्बाब्वे के बल्लेबाज सुरुआते से दबाव में आ गइल लो आ लगातार विकेट गंवावत रहल।
अगर दूसरका टी20 में पिच के मिजाज एही तरे रहल, त नया गेना से तेज गेंदबाजन के फेर फायदा मिल सकेला। हालांकि मैच आगे बढ़ला के बाद बल्लेबाजी कुछ आसान होखे के उम्मेद बा।
टॉस जीते वाली टीम पहिले गेंदबाजी करे के कs सकेले फैसला
हरारे के हालात देखत टॉस के भूमिका बहुते अहम मानल जा रहल बा। टॉस जीते वाली टीम पहिले गेंदबाजी करे के फैसला ले सकेले, ताकि सुरुआती ओवरन में पिच पs मवजूद नमी आ स्विंग के पूरा फायदा उठावल जा सके। दूसरका पारी में पिच कुछ आसान हो सकेला, एह चलते लक्ष्य के पीछा करे वाली टीम के बढ़त मिल सकेला।
मौसम के हाल
दूसरका टी20 मैच के दौरान मौसम साफ रहे के संभावना बा। बरखा के खास खतरा नइखे आ तापमान करीब 20 डिग्री सेल्सियस रहे के अनुमान बा। एह चलते पूरा 20-20 ओवर के रोमांचक मुकाबला देखे के मिल सकेला।
वैभव सूर्यवंशी पs फेर रही सब केहू के नजर
पहिलका टी20 में भारत के जीत दिलावे में जुवा बल्लेबाज वैभव सूर्यवंशी के अहम जोगदान रहे। ऊ खाली 19 गेना में तूफानी 50 रन बनवले रहलें, जवना के बदौलत टीम इंडिया 126 रन के लक्ष्य आसानी से हासिल कs लेलस।
अब दूसरका टी20 में फेर सब केहू के नजर वैभव सूर्यवंशी पs टिकल रही। फैंस के उम्मेद बा कि ऊ एक बेर फेर आक्रामक बल्लेबाजी करत टीम के मजबूत सुरुआत दिहें।
अभिषेक शर्मा से रही बेहतर पारी के उम्मीद
सलामी बल्लेबाज अभिषेक शर्मा पहिलका मुकाबला में कुछ खास कमाल ना देखा सकलें। एह कारण दूसरका टी20 में उनकर प्रदर्शन पs सब केहू के नजर रही। जदि अभिषेक बढ़िया सुरुआत देत बाड़ें, तs भारत के जीत के राह आउर आसान हो सकेला।
