स्पोर्ट्स डेस्क। भारत के स्टार जैवलिन थ्रोअर नीरज चोपड़ा लुसाने डायमंड लीग में सानदार प्रदर्शन करत अपना सीजन के सबसे बढ़िया थ्रो दर्ज कइलें। नीरज 88.05 मीटर के थ्रो के संगे दूसरा स्थान पs रहलें। हालांकि, श्रीलंका के उभरत स्टार रुमेश थरंगा पथिरागे 88.14 मीटर के थ्रो कs के नीरज के मात्र 9 सेंटीमीटर से पछाड़ देलें।
पथिरागे के सानदार प्रदर्शन के चलते नीरज एक बेर फेर पहिला स्थान हासिल करे से चूक गइलें। हाल के मुकाबलन में पथिरागे लगातार नीरज खातिर एगो मजबूत चुनौती बनके उभरल बाड़ें।
लुसाने में नीरज के सीजन बेस्ट थ्रो
लुसाने डायमंड लीग में नीरज चोपड़ा 88.05 मीटर के थ्रो कइलें, जवन एह सीजन में उनकर सबसे बढ़िया प्रदर्शन रहे। भारतीय फैंस के उम्मीद रहे कि नीरज एह प्रदर्शन के संगे खिताब अपना नाम करिहें, बाकिर पथिरागे 88.14 मीटर के थ्रो कs के बाजी मार ले गइलें।
नीरज आ पथिरागे के बीच मात्र 0.09 मीटर माने 9 सेंटीमीटर के अंतर रहे। एकरा से साफ बा कि मुकाबला बहुते करीबी रहे।
तिसरका बेर नीरज के पीछे छोड़लें पथिरागे
रुमेश पथिरागे हाल के समय में नीरज चोपड़ा खातिर लगातार चुनौती पेश करत बाड़ें। लुसाने डायमंड लीग में नीरज के पीछे छोड़ल ई उनकर तिसरका बड़ा मवका रहे। लुसाने से पहिले ग्लास्गो राष्ट्रमंडल खेल में पथिरागे नीरज के पछाड़के स्वर्ण पदक जीतले रहलें। जून में आयोजित दोहा डायमंड लीग में पथिरागे नीरज से आगे रहलें।
चोट के बावजूद नीरज के सानदार वापसी
नीरज चोपड़ा पिछिला कुछ समय से पीठ के परेसानी से जूझत रहल बाड़ें। एकरा बादो राष्ट्रमंडल खेल आ लुसाने डायमंड लीग में उनकर प्रदर्शन सानदार रहे। 88.05 मीटर के थ्रो नीरज के बढ़िया फॉर्म में वापसी के संकेत दे रहल बा।
नीरज के सामने बढ़ल चुनौती
नीरज चोपड़ा टोक्यो ओलंपिक में स्वर्ण पदक जीतके भारतीय एथलेटिक्स में इतिहास रचले रहलें। हालांकि, पेरिस ओलंपिक 2024 में पाकिस्तान के अरशद नदीम उनकर सबसे बड़ चुनौती बनलें आ स्वर्ण पदक जीतलें, जबकि नीरज के रजत पदक से संतोष करे के पड़ल।
अब अरशद नदीम के प्रदर्शन में गिरावट के बीच पथिरागे जैवलिन थ्रो में नया चुनौती बनके सामने आ रहल बाड़ें। लगातार तीन बड़ मुकाबला में नीरज के पीछे छोड़के पथिरागे आपन दमखम साबित कइले बाड़ें।
Read Also: Champaran Road Accident : चंपारण में बड़ सड़क हादसा, ऑर्केस्ट्रा देख रहल लोगन के बस रउदलस, 5 के मौत
