देवरिया। जिला के खुखुंदू थाना क्षेत्र में बिजली करंट से 18 साल के जुवक के मौत के बाद गांव में भारी आक्रोश देखे के मिलल। एयरफोर्स में भरती के तइयारी करत निखिल कुशवाहा के करंट लगला से मौत हो गइल। पोस्टमार्टम के बाद जब शव गांव पहुंचल तs परिवार आ ग्रामीण लोग अंतिम संस्कार करे से इनकार कs देलें। लोग बिजली विभाग पs लापरवाही के आरोप लगावत मुआवजा, सरकारी नौकरी आ दोषियन पs कार्रवाई के मांग करे लागल।
विद्युत विभाग पs लापरवाही के आरोप
ग्रामीणन के कहनाम रहे कि ई हादसा बिजली विभाग के लापरवाही के चलते भइल बा। परिवार के लोग कहल कि जब तक सरकार से उचित मुआवजा आ कार्रवाई के भरोसा ना मिली, तब तक अंतिम संस्कार ना कइल जाई।
घटना के जानकारी मिलतही प्रशासन हरकत में आ गइल। तहसीलदार अलका सिंह, नायब तहसीलदार गोपाल प्रसाद, प्रभारी निरीक्षक राहुल सिंह, कानूनगो आ लेखपाल गांव पहुंचलें। पूर्व विधायक मनबोध प्रसाद पीड़ित परिवार से मिललें आ हालचाल जनलें।
परिवार के प्रमुख मांग का बा?
पीड़ित परिवार प्रशासन के सामने कइयन गो मांग रखलें।
- परिवार के एगो सदस्य के सरकारी नौकरी।
- 30 लाख रुपिया के मुआवजा।
- किसान आपदा राहत योजना के तहत आर्थिक सहायता।
- बिजली विभाग के जिम्मेदार कर्मचारी पs कार्रवाई।
ग्रामीणन के कहनाम रहे कि जदि विभाग समय रहते लापरवाही ना करित तs एगो होनहार जुवक के जान ना जाइत।
प्रशासन देलस मदद के भरोसा
देर रात तक प्रशासनिक अधिकारी आ ग्रामीणन के बीच बातचीत चलल। अधिकारी परिवार के भरोसा दिहल लोग कि बिजली विभाग में मानदेय के आधार पs रोजगार उपलब्ध करावे के कोसिस कइल जाई। संगही आपदा प्रबंधन विभाग के नियम अनुसार आर्थिक सहायता दिलावे के प्रक्रिया सुरू कइल जाई।
अधिकारी लोग इहो कहल कि शासन से मिल सके वाला बाकी सहायता परिवार तक पहुंचावे के पूरा प्रयास कइल जाई।
आश्वासन के बाद मानल परिवार
घंटन चलल बातचीत के बाद परिवार प्रशासन के आश्वासन पs राजी हो गइल। एकरा बाद समझौता के औपचारिक प्रक्रिया पूरा भइल आ अंतिम संस्कार के तइयारी सुरू कs दिहल गइल।
घटना के बाद गांव में भारी संख्या में ग्रामीण जुटल रहलें। कानून-बेवस्था बनवले रखे खातिर पुलिस बल के तैनात कइल गइल रहे। प्रशासन के मोताबिक पूरा इस्थिति शांतिपूर्ण रहल।
