स्पोर्ट्स डेस्क। विमेंस टी20 विश्व कप 2026 में पाकिस्तान महिला टीम के खिलाफ छठवां मुकाबला में भारतीय स्पिन गेंदबाज दीप्ति शर्मा इतिहास रच देली। अतवार के खेलल गइल एह मुकाबला में दीप्ति अपना सानदार गेंदबाजी से पाकिस्तान के बल्लेबाजी के कमर तुड़ देली आ एगो खास रिकॉर्ड अपना नावे कs लेली।
पाकिस्तान के खिलाफ टॉस जीत के पहिले बल्लेबाजी करत भारतीय टीम 20 ओवर में 6 विकेट गवां के 170 रन बनवलस। 171 रन के लक्ष्य के पीछा करे उतरल पाकिस्तान टीम के सुरुआत ठीक-ठाक रहल, बाकिर ओकरा बाद दीप्ति शर्मा मैदान पs कमाल दिखवली आ भारत के मुकाबला में वापसी करवा देली।
दीप्ति शर्मा झटकली पांच विकेट
दीप्ति शर्मा इहवें ना रुकली। ऊ 17वां ओवर में पाकिस्तान के तीन बल्लेबाजन के आउट कs के आपन पांच विकेट पूरा कइली। पूरा मुकाबला में ऊ बहुते किफायती गेंदबाजी कइली।
दीप्ति अपना चार ओवर के स्पेल में मात्र 10 रन देके पांच विकेट हासिल कइली। उनकर इकोनॉमी रेट 2.50 रहे। एह सानदार प्रदर्शन के संगे दीप्ति शर्मा के इंटरनेशनल क्रिकेट में विकेट के संख्या 354 हो गइल बा।
एह उपलब्धि के संगे ऊ महिला इंटरनेशनल क्रिकेट में सबसे जादे विकेट लेवे वाली दुनिया के दूसरका गेंदबाज बन गइल बाड़ी। एह सूची में पहिला स्थान पs भारत के पूर्व तेज गेंदबाज झूलन गोस्वामी बाड़ी, जिनका नामे 355 विकेट दर्ज बा।
महिला क्रिकेट में सबसे जादे इंटरनेशनल विकेट
- 355 विकेट – झूलन गोस्वामी (भारत)
- 354 विकेट – दीप्ति शर्मा (भारत)
- 335 विकेट – कैथरीन साइवर-ब्रंट (इंग्लैंड)
- 332 विकेट – एलिस पैरी (ऑस्ट्रेलिया)
- 327 विकेट – सोफी एक्लेस्टोन (इंग्लैंड)
- 318 विकेट – शबनीम इस्माइल (दक्षिण अफ्रीका)
टी20 विश्व कप में भारत खातिर पांच विकेट लेवे वाली गेंदबाज
- 5/10 – दीप्ति शर्मा बनाम पाकिस्तान, बर्मिंघम, 2026
- 5/15 – रेणुका ठाकुर बनाम इंग्लैंड, गेबेरहा, 2023
- 5/16 – प्रियंका रॉय बनाम पाकिस्तान, टॉनटन, 2009
महिला टी20 इंटरनेशनल में दीप्ति के दबदबा
महिला टी20 इंटरनेशनल क्रिकेट में सबसे जादे विकेट लेवे वाली गेंदबाजन के सूची में दीप्ति शर्मा सबसे ऊपर पहुंच गइल बाड़ी।
- 166 विकेट – दीप्ति शर्मा
- 165 विकेट – थिपाचा पुथावोंग
- 160 विकेट – हेनरीट इशिमवे
- 152 विकेट – मेगन शुट्ट
- 148 विकेट – हे कामचोम्फु
भारत पाकिस्तान के 64 रन से हरवलस
मुकाबला के बात करीं तs भारतीय टीम पहिले बल्लेबाजी करत 170 रन बनवलस। स्मृति मंधाना 44 गेना में सानदार 68 रन के पारी खेलली। ओहिजा, हरमनप्रीत कौर 36 रन आ ऋचा घोष 17 गेना में तेज 34 रन बनवली।
जवाब में पाकिस्तान महिला टीम 17 ओवर में मात्र 106 रन पs ऑलआउट हो गइल। भारत खातिर दीप्ति शर्मा पांच विकेट लेली, जबकि श्रीचरणी तीन विकेट चटकवली। एह जीत के संगे भारतीय टीम विमेंस टी20 विश्व कप 2026 में आपन मजबूत दावेदारी पेश कs देले बा।
