गोरखपुर। डीएवी पीजी कॉलेज, गोरखपुर में आयोजित वार्षिक क्रीड़ा प्रतियोगिता के समापन समारोह के आयोजन बुध के महाविद्यालय परिसर में धूमधाम से कइल गइल। प्रतियोगिता के समापन के जानकारी महाविद्यालय के प्राचार्य प्रो. शैल पांडेय देली। ऊ बतवलें कि क्रीड़ा प्रतियोगिता के बाद अब सांस्कृतिक कार्यक्रमन के आयोजन 26 फरवरी 2026 से कइल जाई।
समापन समारोह के मुख्य अतिथि दिग्विजयनाथ पीजी कॉलेज के प्राचार्य प्रो. ओम प्रकाश सिंह रहलें, जबकि विशिष्ट अतिथि के रूप में प्रो. राणा प्रताप सिंह (अध्यक्ष, पीएचएसएस फाउंडेशन) आ डॉ. एनके सिंह उपस्थित रहलें। कार्यक्रम के सुरुआत अतिथियन के ओर से मां सरस्वती के चित्र पs पुष्पार्पण आ दीप प्रज्वलन से होई। एकरा बाद जेनिस आ मीनाक्षी सरस्वती वंदना प्रस्तुत कs के माहौल के भक्तिमय बना देलें।
महाविद्यालय के शिक्षक डॉ. संजय कुमार पांडेय आ प्रो. परेश सनत अतिथियन के अंगवस्त्र आ स्मृति चिह्न भेंट कs के सम्मानित कइल लोग। एह अवसर पs प्राचार्य प्रो. ओम प्रकाश सिंह अपना संबोधन में कहलें कि खेलकूद से व्यक्तित्व के सर्वांगीण विकास होला आ ई प्रतिस्पर्धा से जादे सहजोग आउर टीम भावना के बढ़ावा देला। ओहिजा, पर्यावरणविद् प्रो. राणा प्रताप सिंह खेल के संगे अनुशासन के महत्व पs जोर देत विजेता प्रतिभागियन के सुभकामना देलें।
क्रीड़ा प्रतियोगिता में दयानंद टी-10 क्रिकेट (वाणिज्य संकाय) के टीम के ट्रॉफी देके सम्मानित कइल गइल। 100 मीटर दउड़ बालक वर्ग में सादिर अंसारी आ बालिका वर्ग में अर्पणा पारिक पहिला स्थान प्राप्त कइलें। एकरा अलावे शिक्षक आ शिक्षणेत्तर कर्मचारियन के बीच एगो मैत्रीपूर्ण टी-10 क्रिकेट मैच खेलल गइज, जवना में शिक्षकन के टीम विजयी रहल।
कार्यक्रम के संचालन डॉ. संजय कुमार मिश्र कइलें, जबकि धन्यवाद ज्ञापन क्रीड़ा सचिव डॉ. संजय कुमार देलें। एह मवका पs बड़ संख्या में शिक्षक, कर्मचारी आ छात्र-छात्रा उपस्थित रहे लोग, जवना से समापन समारोह यादगार बन गइल।
Read Also: IND vs ZIM : सुपर-8 में भारत खातिर करs भा मरs के मुकाबला, जिम्बाब्वे से चेन्नई में भिड़ंत
