वैशाली। बिहार के वैशाली जिला में सामाजिक सुरक्षा पेंशन योजना के पईसा ट्रांसफर होखला के बाद एगो चउकावे वाला तकनीकी गड़बड़ी सामने आइल बा। महुआ आ जंदाहा प्रखंड के दू गो पेंशनधारी के बैंक खाता में अचानक करोड़न आ अरबन रुपिया देखाई देवे लागल। ममिला सामने आवते प्रशासन हरकत में आ गइल आ दुनो खाता पs फिलहाल लेन-देन रोक दिहल गइल बा।
जानकारी के मोताबिक, राज्य सरकार 10 जुलाई के सामाजिक सुरक्षा पेंशन योजना के लाभुकन के खाता में मासिक पेंशन भेजले रहे। एह दौरान महुआ प्रखंड के गोविंदपुर पंचायत के चखाजे गांव के बुजुर्ग पेंशनधारी चंद्रदीप राय 1100 रुपिया निकाले खातिर उत्तर बिहार ग्रामीण बैंक के ग्राहक सेवा केंद्र (सीएसपी) पहुंचल रहलें।
खाता के बैलेंस देख सीएसपी संचालक रह गइलें दंग
पेंशन निकाले के बाद जब सीएसपी संचालक खाता के बचल बैलेंस देखलें तs स्क्रीन पs लउकल रकम देखके ऊ खुद हैरान रह गइलें। खाता में 7 अरब 40 करोड़ 68 लाख 72 हजार 795 रुपिया से अधिक राशि देखावल जात रहे। एगो साधारण पेंशन खाता में एतना बड़ रकम देखाई देला के खबर देखते-देखते पूरा इलाका में फइल गइल।
जंदाहा में सामने आइल अइसने ममिला
महुआ के घटना के कुछे देर बाद जंदाहा प्रखंड के खोपी गांव से अइसने ममिला सामने आइल। ओहिजा सामाजिक सुरक्षा पेंशन योजना के लाभुक राजन सिंह के बैंक खाता में अचानक 7 करोड़ रुपिया से जादे राशि लउके लागल। एके जिला के दूगो अलग-अलग प्रखंड में अइसन घटना होखला से प्रशासन आ बैंक अधिकारियन के चिंता बढ़ गइल बा।
प्रशासन खाता पs लगवलस रोक
ममिला के जानकारी मिलते महुआ के प्रखंड विकास पदाधिकारी (बीडीओ) सौरव वर्णवाल के सूचना दिहल गइल। ओकरा बाद पंचायत सचिव अशोक सिंह लाभुक के घरे पहुंचके पूरा इस्थिति से अवगत करवलें। प्रशासन पेंशनधारी के सलाह देलस कि अगिला आदेस तक खाता से कवनो प्रकार के लेन-देन मत करस। संगही खाता के संचालन पs रोक लगा दिहल गइल बा।
तकनीकी गड़बड़ी के जांच जारी
बीडीओ सौरव वर्णवाल बतवलें कि पूरा ममिला के जानकारी वरीय अधिकारियन के भेज दिहल गइल बा। सुरुआती जांच में ई ममिला बैंकिंग सिस्टम भा सर्वर के तकनीकी खराबी से जुड़ल लागत बा। बैंक आ संबंधित विभाग मिलके ई पता लगावे में जुटल बा कि आखिर खाता में एतना बड़ रकम कइसे देखावे लागल। जांच रिपोर्ट अइला के बादे असली कारण साफ हो पाई।
