Dharmendra Pradhan Resignation : केंद्रीय शिक्षा मंत्री पद से धर्मेंद्र प्रधान के इस्तीफा के बाद देस के राजनीति गरमा गइल बा। केंद्रीय गृह मंत्री अमित शाह धर्मेंद्र प्रधान के फैसला के सराहना करत कहलें कि भारतीय जनता पार्टी खातिर देस, जुवा आ छात्र कवनो पद से ऊपर बा। उनका मोताबिक, राष्ट्रीय हित खातिर पद छोडे के जवाबदेही आ समर्पण के सबसे बड़ उदाहरण बा।
अमित शाह सोशल मीडिया प्लेटफॉर्म X पs पोस्ट करत लिखलें कि भाजपा के कार्यकर्ता हमेसा देस के सर्वोपरि मानेला। उनका अनुसार, जुवा आ छात्रन के भविष्य कवनो राजनीतिक पद से कहीं जादे महत्वपूर्ण बा। धर्मेंद्र प्रधान के इस्तीफा एह सोच के मजबूत सनेस देत बा कि जब देसहित के सवाल होखे, तs व्यक्तिगत पद के महत्व कम हो जाला।
पीएम मोदी के फैसला के सरहलें
गृह मंत्री कहलें कि प्रधानमंत्री नरेंद्र मोदी के सरकार हमेसा देस के छात्रन के भावना के सम्मान कइले बा। सरकार परीक्षा प्रणाली के पारदर्शी बनावे आ पेपर लीक जइसन घटनन पs रोक लगावे खातिर लगातार सुधार कs रहल बा।
अमित शाह कहलें कि दोषी लोग के खिलाफ सख्त कार्रवाई के प्रधानमंत्री के फैसला से नीट परीक्षा पास करे वाला छात्रन के न्याय मिली आ परीक्षा बेवस्था में भरोसा आउर मजबूत होई।
धर्मेंद्र प्रधान के कार्यकाल के गिनवलें उपलब्धि
अमित शाह धर्मेंद्र प्रधान के शिक्षा मंत्री के रूप में कइयन गो अहम उपलब्धियन के जिकिर कइलें। उनका अनुसार, प्रधान के नेतृत्व में-
- राष्ट्रीय शिक्षा नीति (NEP) के प्रभावी लागू कइल गइल।
- पीएम श्री स्कूल योजना के तेजी से विस्तार भइल।
- डिजिटल शिक्षा के बढ़ावा मिलल।
- स्किल डेवलपमेंट कार्यक्रम मजबूत भइल।
- इंडस्ट्री आ शिक्षा संस्थान के बीच बेहतर तालमेल स्थापित भइल।
- छात्र-केंद्रित आ अधिक समावेशी परीक्षा बेवस्था पs जोर दिहल गइल।
शाह कहलें कि धर्मेंद्र प्रधान के पूरा कार्यकाल विकसित भारत के लक्ष्य के पूरा करे के दिशा में समर्पित रहल।
नीट विवाद के बीच आइल इस्तीफा
धर्मेंद्र प्रधान के इस्तीफा अइसन समय पs आइल बा जब नीट परीक्षा में कथित गड़बड़ी के लेके देसभर में विरोध प्रदर्शन हो रहल बा। छात्र संगठन आ विपक्ष लगातार जवाबदेही के मांग करत रहे।
एह घटनाक्रम के बाद राजनीतिक माहौल गरमा गइल बा। विपक्षी दल एह इस्तीफा के छात्र आंदोलन के जीत बता रहल बा, जबकि भाजपा एकरा के जवाबदेही, पारदर्शिता आ राष्ट्रीय हित के प्रति प्रतिबद्धता के उदाहरण मानत बिया।
