पंजाब के जालंधर में सोमार के साँझ के कबड्डी खेलाडी के गोली मार के ह्त्या कs देहल गइल। एगो कबड्डी टूर्नामेंट के बीचे अज्ञात बदमास एह वारदात के अंजाम देहले सs। दरअसल, अंतराष्ट्रीय कबड्डी खेलाड़ी संदीप नंगल अंबिया के गोली लगला के बाद मवका पs भगदड़ मच गइल। सूचना मिलला पs भारी संख्या में पुलिस बल घटना के जगे पहुंचल।
जानकारी के मोताबिक, सोमार के साँझ स्टेडियम में खेलल जा रहल कबड्डी टूर्नामेंट के एगो मुक़ाबला के बीचे अंधाधुंध गोली चलल सुरू हो गइल। एह फायरिंग में कबड्डी टीम में सामिल संदीप नंगल अंबिया के कइयन गो गोली लागल। ई देख के दर्शकन में भगदड़ मच गइल। केहु कुछो समझ पाइत, ओकरा से पहिले फायरिंग करे आला बदमास मवका से फरार हो गइले सs।
https://www.kooapp.com/koo/parminderdhindsa/986acfd4-931e-46c4-958d-37909b352fb8
ओहिजा आनन-फानन में घटना स्थल पs मवजूद घवाहिल खेलाड़ी के एगो चार पहिया गाड़ी में लाद के अस्पताल ले गइल लो। बाकिर, खून बेसी बह गइला के वजे से उनकर रस्ते में मौत हो गइल। सूचना मिलते पुलिस के टीम मवका पs अस्पताल में पहुंचल। इलाका में हालात ना बिगड़े एकरा ला भारी संख्या में पुलिस फोर्स तैयार कइल गइल।
