सेंट्रल डेस्क। वाराणसी दौरा पs पहुंचल कैबिनेट मंत्री ओमप्रकाश राजभर सोमार के यूजीसी के नियमावली पs बोलत कहलें कि जदि एह नियम में कवनो गड़बड़ी बा तs सुप्रीम कोर्ट जाईं। जे जाये के चाहत बा, ओकरा खातिर कोर्ट के दरवाजा खुलल बा। ऊ कहलें कि शिक्षा के क्षेत्र में ओबीसी, एससी आ एसटी के संगे भेदभाव होला आ एह भेदभाव के लड़ाई हमनी के लड़ेम सs।
चुनाव के पूरा तइयारी में बिया सरकार
त्रिस्तरीय पंचायत चुनाव कब होई, एह सवाल पs राजभर कहलें कि सरकार चुनाव के पूरा तइयारी कs रहल बिया। मतपत्र छप गइल बा आ सब जिलन में भेजल जा रहल बा। शंकराचार्य अविमुक्तेश्वरानंद के बयान पs राजभर साफ कहलें कि देस संविधान से चलेला, कवनो बयान से संविधान बदले वाला नइखे। केहूओ के कहला से कुछो ना होखे।
गौमाता के राज्यमाता के दर्जा देवे के बयान पs ऊ कहलें कि जब ई मुद्दा कैबिनेट में आई, तब ओकरा पs विचार कइल जाई।
राजभर समाज पs कहलें बड़ बात
सुहेलदेव जयंती पs अनिल राजभर के ओर से मंच से दिहल बयान पs ओमप्रकाश राजभर कहलें कि जदि कवनो जगह वोट बेचे के दुकान चल रहल बा तs बताईं, अगर माई के लाल हउवें तs। राजभर समाज के नेता के, एह सवाल पs ऊ कहलें कि आज जे लोग उंगली उठा रहल बा, ऊ पहिले लोहा चोरी करत रहे। 23 साल में जवन काम ओमप्रकाश कइले बाड़ें, ऊ आज तक केहू कइले बा का? जब हम अपना बाप के बाप कहे लगनी, तब लोगन के ध्यान सुहेलदेव महाराज पs गइल।
राजभर कहलें कि सपा पीडीए के नारा दे रहल बिया, बाकिर पीडीए के मतलब परिवार डेवलपमेंट अथॉरिटी हs। बरेली के सिटी मजिस्ट्रेट के इस्तीफा आ शंकराचार्य से मुलाकात पs ऊ कहलें कि ई सब ड्रामा आ राजनीति बा। आखिर में राजभर कहलें, “हम राजभर बानी, आ राजभर सीना ठोक के बोलेला।”
Read Also: UP News : यूपी सरकार के बड़ फैसला, 68 हजार कर्मियन के सैलरी रोकल गइल, जानीं कारण
