मुंबई। महाराष्ट्र के छत्रपति संभाजीनगर में एगो दर्दनाक घटना हर केहू के झकझोर देलस। कोहड्या डोंगर में 18 साल के कुणाल के पिता से विवाद के बाद पहाड़ी पs चल गइला के बाद ओकरा के मनावे गइल माता-पिता करीब 300 फीट नीचे गिर गइल लो। हादसा में कुणाल, ओकर पिता आ मां संगीता तीनो के मौत हो गइल।
बतावल जा रहल बा कि विवाद आईफोन के किस्त के लेके भइल रहे। कुणाल नाराज होके पहाड़ी पs जा बइठल रहे। ओकरा के मनावे खातिर परिवार के लोग आ गांव के सरपंचो पहुंचल रहलें। बहुत समझवला के बादो ऊ नीचे ना आइल। आखिर में जब माता-पिता ओकरा के बचावे खातिर पहाड़ी पs गइल लो, तब तीनो लोग नीचे गिर गइल।
हादसा से एक दिन पहिले मां शेयर कइले रहली वीडियो
एह घटना से ठीक एक दिन पहिले कुणाल के मां संगीता यूट्यूब पs एगो वीडियो शेयर कइले रहली। वीडियो में ऊ रिश्तन में सम्मान, प्यार आ आपसी समझदारी के महत्व के बारे में बात करत नजर आइल रहली।
संगीता कहले रहली कि रिश्ता तबे मजबूत होला, जब दुनो तरफ से एक-दूसरा के सम्मान आ कदर होखे। अगर रिश्ता खाली एगो इंसान निभावत होखे आ सामने वाला ओकर भावना के सम्मान ना करत होखे, तs अइसन रिश्ता पs दोबारा विचार करे के जरूरत बा।
प्रेरणादायक वीडियो बनावत रहलीं संगीता
संगीता यूट्यूब पs नियमित रूप से प्रेरणादायक वीडियो पोस्ट करत रहलीं। उनका चैनल पs 29 हजार से जादे फॉलोअर्स बतावल जा रहल बा। ऊ अपना बेटा कुणाल के संगे छोट-छोट व्लॉगो शेयर करत रहली।
मां के वीडियो अब हादसा के बाद सोशल मीडिया पs तेजी से चरचा आ गइल बा। घटना के बाद परिवार आ गांव में मातम पसर गइल बा।
