मुंबई। भारतीय शेयर बाजार में मंगर के कारोबार के दौरान गिरावट जारी रहल। पश्चिम एशिया में तनाव बढ़े आ शांति के उम्मीद कमजोर पड़े के असर निवेशकन के धारणा पs पड़ल। बढ़त कच्चा तेल के दाम आ वैश्विक ब्याज दर के चिंता के चलते सेंसेक्स आ निफ्टी दबाव में देखाई देलस।
सुरुआती कारोबार में बीएसई सेंसेक्स 278.32 अंक टूटके 77,450.64 पs आ गइल। ओहिजा, एनएसई निफ्टी 57.65 अंक गिरके 24,230.45 के स्तर पs कारोबार करत रहे। बाजार में लगातार गिरावट के चलते निवेशक अब कच्चा तेल के कीमत, बिदेसी निवेश आ वैश्विक बाजार के रुख पs नजर रखले बा लो।
काहे गिर रहल बा भारतीय शेयर बाजार?
भारतीय शेयर बाजार में गिरावट के पीछे कइयन गो प्रमुख कारण बतावल जा रहल बा। सबसे बड़ कारण कच्चा तेल के बढ़त दाम आ पश्चिम एशिया में तनाव बा।
वैश्विक तेल बेंचमार्क ब्रेंट क्रूड 0.63 फीसदी बढ़के 91.46 डॉलर प्रति बैरल तक पहुंच गइल। ईरान आ अमेरिका के बीच बढ़त तनाव के चलते कच्चा तेल के दाम में तेजी देखे के मिलल।
विशेषज्ञन के मोताबिक, तेल के दाम लगातार ऊपर रहला से भारत जइसन तेल आयात करे वाला देस पs दबाव बढ़ सकेला। एकरा से बाजार में निवेशक सावधानी बरत रहल बाड़ें।
अमेरिकी बॉन्ड यील्ड बढ़ला से बढ़ल चिंता
अमेरिका के 10 साल वाला बॉन्ड यील्ड बढ़के 4.73 फीसदी तक पहुंच गइल। ई बिदेसी संस्थागत निवेशक माने FII खातिर नकारात्मक संकेत मानल जा रहल बा।
ऊंच बॉन्ड यील्ड के चलते बिदेसी निवेशक अमेरिकी बाजार में निवेश के ओर आकर्षित हो सकेला लो। एकरा से उभरत बाजार, खास कs के भारतीय शेयर बाजार में बिदेसी पूंजी के प्रवाह पs असर पड़ सकेला।
एक्सचेंज के आंकड़न के मोताबिक, सोमार के बिदेसी संस्थागत निवेशक 2,535.10 करोड़ रुपिया के शेयर बेचल लो।
सेंसेक्स के कवन शेयर सबसे जादे टूटल?
मंगर के सुरुआती कारोबार में सेंसेक्स के प्रमुख शेयरन में गिरावट देखे के मिलल। भारती एयरटेल, एशियन पेंट्स, इंटरग्लोब एविएशन, इंफोसिस, एचसीएल टेक आ टेक महिंद्रा प्रमुख गिरावट वाला शेयर रहे।
दूसरका ओर, कुछ शेयरन में खरीदारियो देखल गइल। रिलायंस इंडस्ट्रीज, सन फार्मा, मारुति आ एक्सिस बैंक बढ़त वाला प्रमुख शेयरन में सामिल रहे।
लगातार गिरावट से निवेशकन में बढ़ल चिंता
भारतीय शेयर बाजार में लगातार कमजोरी से निवेशकन के धारणा पs असर पड़ल बा। सोमार के कारोबार में सेंसेक्स आ निफ्टी गिरावट के संगे बंद भइल रहे।
सेंसेक्स 281.09 अंक माने 0.36 फीसदी गिरके 77,728.16 पs बंद भइल रहे। ओहिजा, निफ्टी 78.35 अंक माने 0.32 फीसदी टूटके 24,287.65 पs बंद भइल रहे।
बाजार विशेषज्ञन के कहनाम बा कि फिलहाल कच्चा तेल के कीमत, पश्चिम एशिया के घटनाक्रम आ अमेरिकी बॉन्ड यील्ड बाजार के दिशा तय करे में महत्वपूर्ण भूमिका निभा रहल बा।
भारतीय अर्थबेवस्था के मजबूती बनल सकारात्मक संकेत
बाजार में दबाव के बादो भारतीय अर्थबेवस्था के मजबूती आ कंपनियन के आय में सुधार सकारात्मक संकेत के रूप में देखल जा रहल बा। जदि वैश्विक स्तर पs तनाव कम होला आ कच्चा तेल के कीमत में नरमी आवेला, तs बाजार में दोबारा तेजी लवट सकेला।
