स्पोर्ट्स डेस्क : भारत ए आ श्रीलंका ए के बीच खेलल जा रहल त्रिकोणीय वनडे सीरीज के पहिला मुकाबला में जुवा बल्लेबाज वैभव सूर्यवंशी सानदार सुरुआत कइलें, बाकिर ऊ आपन पारी के बड़ स्कोर में ना बदल पवलें। सुरुआती ओवर में लगातार चउका बरसावे वाला वैभव 14 रन बनाके आउट हो गइलें।
श्रीलंका के दांबुला इस्थित रंगीरी दांबुला इंटरनेशनल स्टेडियम में भारत ए, श्रीलंका ए आ अफगानिस्तान ए के बीच त्रिकोणीय सीरीज खेलल जा रहल बा। मुकाबला में भारत ए के कप्तान टॉस जीतके पहिले बल्लेबाजी करे के फैसला लेलें। टीम के सुरुआत कुछ खास ना रहल, बाकिर वैभव सूर्यवंशी अपना आक्रामक बल्लेबाजी से दर्शकन के प्रभावित कइलें।
वैभव सूर्यवंशी के बल्ला से निकलल सानदार चौका
वैभव सूर्यवंशी मैदान पर आवतही तेजी से रन बनावल सुरू कइलें। ऊ श्रीलंका ए के गेंदबाज मोहम्मद शिराज के ओवर में लगातार दूगो सानदार चउका लगवलें। पहिला चउका बैकफुट ड्राइव के माध्यम से पॉइंट दिशा में गइल, जबकि दूसरा चउका कवर के ऊपर से सानदार शॉट खेलके बटोरल गइल।
एकरा बाद अगिला ओवर में चमिका करुणारत्ने के गेना पs वैभव चौका लगवलें आ साफ संकेत देलें कि ऊ बड़ पारी खेले के मूड में बाड़ें।
कैच आउट होके खतम भइल पारी
वैभव तेजी से रन बनावत रहलें आ लागत रहे कि ऊ टीम खातिर महत्वपूर्ण पारी खेलिहें। बाकिर चउथा ओवर में श्रीलंका ए के बड़ा सफलता मिल गइल। मोहम्मद शिराज के फुल लेंथ गेंद पs बड़ शॉट खेले के कोसिस में बल्ला ठीक से ना लागल आ गेना मिड-ऑफ दिशा में चल गइल।
श्रीलंका ए के कप्तान सहान अराचिगे सानदार डाइव लगाके कैच पकड़ लेलें आ वैभव सूर्यवंशी के पारी के अंत हो गइल।
प्रभसिमरन सिंह भइलें जल्दिये आउट
वैभव सूर्यवंशी 12 गेना में 14 रन बनवलें, जवना में तीन गो चउका सामिल रहे। भले ऊ लमहर पारी ना खेल पवलें, बाकिर फेर एक बेर साबित कs देलें कि ऊ सुरुआत से गेंदबाजन पs दबाव बनावे के क्षमता रखेलें। ओहिजा प्रभसिमरन सिंह मात्र 2 रन बनाके पवेलियन लवट गइले।
