सेंट्रल डेस्क। 1 अगस्त नया नियम 2026 देसभर के करोड़न लोग खातिर अहम साबित होखे वाला बा। हर महीना के पहिला तारीख कुछ नया बदलाव लेके आवेला, बाकिर अबकि बेर रेलवे, बैंकिंग, टैक्स आ एलपीजी गैस से जुड़ल कइयन गो नियम बदल रहल बा। जदि रउआ एह बदलाव के जानकारी पहिले से रखेम, तs आर्थिक नुकसान से बच सकत बानीं।
एलपीजी सिलेंडर के नया दाम हो सकेला जारी
हर महीना के पहिला तारीख के तेल कंपनी घरेलू आ कमर्शियल एलपीजी सिलेंडर के दाम के समीक्षा करेली सs। 1 अगस्त से नया रेट लागू हो सकेला। जदि कमर्शियल सिलेंडर महंगा भइल, तs होटल आ रेस्टोरेंट में खाना-पीना के दाम बढ़ सकेला, जवना के असर आम आदमी के बजट पs पड़ी।
तत्काल टिकट बुकिंग खातिर लागू होई नया टोकन सिस्टम
पश्चिम मध्य रेलवे 1 अगस्त से रिजर्वेशन काउंटर पs तत्काल टिकट बुकिंग खातिर नया टोकन सिस्टम लागू करत बा। अब लमहर लाइन आ भीड़ कम करे खातिर एसी तत्काल टिकट के टोकन सबेरे 8:30 से 9:00 बजे तक मिली। जबकि नॉन-एसी टिकट खातिर 9:00 से 9:30 बजे के बीच टोकन जारी होई। टोकन मिलला के बादे टिकट बुकिंग हो सकेला।
क्रेडिट कार्ड इस्तेमाल करे वाला लोग ध्यान देवे
1 अगस्त से कुछ बैंक अपना क्रेडिट कार्ड के नियम, सर्विस चार्ज, रिवॉर्ड प्वाइंट्स आ आउर सुविधा में बदलाव कs सकेला। ई नियम सब बैंकन पs लागू ना होई। एह चलते कार्डधारक लोग अपना बैंक के वेबसाइट भा मोबाइल ऐप पs नया नियम जरूर देख लेवे।
ITR देरी से भरला पs लागी जुर्माना
31 जुलाई तक बिना जुर्माना के इनकम टैक्स रिटर्न (ITR) दाखिल करे के समय सीमा रहे। जदि रउआ समय पs ITR दाखिल ना कइनी, तs अब 1 अगस्त से बिलेटेड रिटर्न भरला पs लेट फीस आ पेनल्टी देवे के पड़ी। टैक्स विशेषज्ञ समय रहते रिटर्न दाखिल करे के सलाह देत बा लो।
CKYC 2.0 सिस्टम होई लागू
1 अगस्त से बैंकिंग आ वित्तीय संस्थान में CKYC 2.0 सिस्टम लागू हो जाई। एह सिस्टम के तहत हर ग्राहक के 14 अंक के यूनिक CKYC नंबर मिली। एकरा बाद बार-बार अलग-अलग बैंक, बीमा कंपनी भा म्यूचुअल फंड में KYC दस्तावेज जमा करे के जरूरत ना रही, जवना से ग्राहकन के सुविधा बढ़ी।
