गोरखपुर। गोरखपुर सदर के सांसद आ अभिनेता रवि किशन शुक्ल आ कैंपियरगंज के विधायक फतेह बहादुर सिंह के सुरक्षा अब आउर मजबूत होखे जा रहल बा। प्रदेश सरकार 30 लोगन खातिर बुलेटप्रूफ जैकेट उपलब्ध करावे के प्रस्ताव के मंजूरी देले बिया। एह सूची में गोरखपुर के दुनो जनप्रतिनिधियन के नाम सामिल बा।
सुरक्षा एजेंसियन के खतरा आ सुरक्षा से जुड़ल आकलन के बाद ई फैसला लिहल गइल बा। दुनो नेता के नाम सूची में सामिल होखला के बाद स्थानीय स्तर पs पुलिस आ सुरक्षा एजेंसियन के सक्रियता आउर बढ़े के उम्मीद बा।
रवि किशन के पहिलहू मिल चुकल बा धमकी
गोरखपुर सदर लोकसभा सीट से लगातार दूसरका बेर सांसद चुनल गइल रवि किशन के पहिलहू कइयन बेर धमकी मिल चुकल बा। पिछिला साल रामगढ़ताल थाना पुलिस धमकी देवे के आरोप में बिहार के एगो जुवक के पंजाब से गिरफ्तार कइले रहे।
धमकी से जुड़ल मामिलन के देखत रवि किशन के सुरक्षा के समय-समय पs समीक्षा होत रहल बा। अब बुलेटप्रूफ जैकेट देवे के फैसला उनकर सुरक्षा बेवस्था मजबूत करे के दिशा में महत्वपूर्ण डेग मानल जा रहल बा।
फतेह बहादुर सिंह के बढ़ल सुरक्षा
कैंपियरगंज विधायक फतेह बहादुर सिंह गोरखपुर के राजनीति में लमहर समय से सक्रिय बाड़ें। ऊ पूर्व मुख्यमंत्री स्वर्गीय वीर बहादुर सिंह के बेटा हवें। करीब 35 साल से राजनीति में सक्रिय फतेह बहादुर सिंह 1996 से लगातार विधानसभा चुनाव जीतत आइल बाड़ें।
ऊ अब तक नौ विधानसभा चुनाव लड़ चुकल बाड़ें आ सात बेर विधायक चुनल गइल बाड़ें। राजनीतिक सफर के सुरुआत में ऊ पनियरा विधानसभा क्षेत्र के प्रतिनिधित्व कइले रहलें। परिसीमन के बाद कैंपियरगंज विधानसभा क्षेत्र उनकर राजनीतिक कर्मभूमि बन गइल।
खतरा के आकलन के बाद लिहल गइल फैसला
सांसद रवि किशन आ विधायक फतेह बहादुर सिंह दुनो के क्षेत्र में लगातार जनसंपर्क रहेला। सार्वजनिक कार्यक्रमन के संगे राजनीतिक आ सामाजिक गतिविधियन में दुनो नेता सक्रिय रहेला लो।
सुरक्षा एजेंसियन के ओर से खतरा के आकलन कइला के बाद पुलिस मुख्यालय के रिपोर्ट भेजल गइल रहे। एह रिपोर्ट के आधार पs प्रदेश सरकार 30 लोग के बुलेटप्रूफ जैकेट उपलब्ध करावे के प्रस्ताव के मंजूरी देले बिया।
