बिजनेस डेस्क। एशिया के सबसे अमीर आदमी के दउड़ में फेर से बड़ बदलाव देखे के मिलल बा। दिग्गज कारोबारी गौतम अदाणी, रिलायंस इंडस्ट्रीज के चेयरमैन मुकेश अंबानी के पछाड़ के फेर से एशिया के सबसे अमीर व्यक्ति बन गइल बाड़ें। ब्लूमबर्ग बिलियनेयर्स इंडेक्स के ताजा आंकड़ा के हिसाब से अदाणी के संपत्ति में तेज बढ़न्ती भइल बा, जवन उनका के टॉप पs पहुंचा देलस।
संपत्ति के आंकड़ा
अब नया रैंकिंग में:
- गौतम अदाणी के कुल संपत्ति बढ़ के करीब 92.6 अरब डॉलर हो गइल बा। एकरा संगही ऊ दुनिया के 19वां सबसे अमीर व्यक्ति बन गइल बाड़ें।
- मुकेश अंबानी अब 90.8 अरब डॉलर के संपत्ति के संगे एशिया में दुसरका नंबर पs आ गइल बाड़ें आ दुनिया में 20वां स्थान पs पहुंच गइल बाड़ें।
काहे बदल रहल बा रैंकिंग?
एह बदलाव के मुख्य कारण शेयर बाजार के प्रदर्शन बा।
- अदाणी ग्रुप के तेजी: एह साल अदाणी के संपत्ति में करीब 8.1 अरब डॉलर के बढ़न्ती भइल बा। हाल के ट्रेडिंग सेशन में, जब BSE सेंसेक्स गिरल रहे, तबो अदाणी ग्रुप के शेयर तेजी से बढ़ल। एके दिन में लगभग 3.56 अरब डॉलर के फायदा भइल।
- रिलायंस के उतार-चढ़ाव: दूसरका ओर, मुकेश अंबानी के संपत्ति में एह साल करीब 16.9 अरब डॉलर के गिरावट देखे के मिलल। हालांकि तनिका फायदो भइल, बाकिर कुल मिलाके शेयर के प्रदर्शन इस्थिर ना रहल।
दुनिया के अरबपति लोगन के हाल
दुनिया के टॉप 20 अरबपतियन में से कइयन लोगन के एह साल नुकसान उठावे के पड़ल बा। लक्जरी ब्रांड मालिक बर्नार्ड अरनॉल्ट के सबसे जादे 44 अरब डॉलर के नुकसान भइल बा।
दुनिया के सबसे अमीर आदमी अभियो एलन मस्क बाड़ें, जिनकर कुल संपत्ति करीब 656 अरब डॉलर बा। उनका बाद लैरी पेज दुसरका नंबर पs बाड़ें।
आगे का होई?
अदाणी आ अंबानी के बीच ई मुकाबला देखा रहल बा कि शेयर बाजार में उतार-चढ़ाव कइसे तेजी से अमीर लोग के रैंकिंग बदल सकेला। आगहूं दुनियाभर के अरबपति लोगन के बीच ई प्रतिस्पर्धा जारी रहला के उम्मेद बा।
Read Also: IT Raid : कोलकाता में TMC उम्मीदवार देवाशीष कुमार के ठिकानन पs IT के रेड, कार्यकर्तन के हंगामा
