स्पोर्ट्स डेस्क। अभिषेक शर्मा दिल्ली कैपिटल्स के खिलाफ आईपीएल 2026 के मुकाबला में अइसन प्रदर्शन कइलें कि ऊ रिकॉर्ड बुक में खास जगह बना लेलें। ई बायां हाथ के आक्रामक बल्लेबाज टी20 करिअर (इंटरनेशनल +लीग+घरेलू टूर्नामेंट) के आपन नवां शतक पूरा कइलें। एह खातिर ऊ 184 पारी खेललें।
ऊ टी20 में सबसे जादे शतक बनावे वाला खिलाड़ियन में संयुक्त रूप से चउथा स्थान पs पहुंच गइल बाड़ें। हालांकि, पारी के हिसाब से सबसे तेज नव शतक पूरा करे में ऊ तीसरा नंबर पs बाड़ें। आईं जानल जावs कि टी20 क्रिकेट में सबसे तेज नव शतक केकरा नामे बा।
अब तक टी20 क्रिकेट में नव भा ओकरा से जादे शतक खाली आठ खिलाड़ी बनवले बा लोग। क्रिस गेल 22 शतक के संगे सबसे ऊपर बाड़ें, जबकि बाबर आजम 12 शतक के संगे दूसरका नंबर पs आ डेविड वॉर्नर 10 शतक के संगे तीसरका नंबर पs बाड़ें। अभिषेक शर्मा के अलावे क्विंटन डिकॉक, विराट कोहली, राइली रूसो आ साहिबजादा फरहान टी20 में नव-नव शतक बना चुकल बाड़ें। अभिषेक अब भारतीय बल्लेबाजन में विराट कोहली के संगे संयुक्त रूप से सबसे जादे 100+ स्कोर करे वाला खिलाड़ी बन गइल बाड़ें।
सबसे तेज नव टी20 शतक पूरा करे वाला खिलाड़ी
- क्रिस गेल- वेस्टइंडीज के दिग्गज क्रिस गेल के नामे सबसे तेज नव शतक पूरा करे के रिकॉर्ड बा। ऊ 124 पारी में ई मुकाम हासिल कइलें।
- साहिबजादा फरहान- पाकिस्तान के ई बल्लेबाज 160 पारी में नव शतक पूरा कइलें आ दूसरका नंबर पs बाड़ें।
- अभिषेक शर्मा-184 पारी में नव शतक पूरा कs के तीसरका स्थान पs बाड़ें।
- बाबर आजम- 248 पारी में नव शतक पूरा कइलें।
- राइली रूसो- 361 पारी में ई उपलब्धि हासिल कइलें।
- विराट कोहली- 364 पारी में नव शतक पूरा कइलें।
- क्विंटन डिकॉक- 426 पारी में नव शतक बनवलें।
- डेविड वॉर्नर- 428 पारी में नव शतक पूरा कइलें।
अभिषेक शर्मा के तूफानी पारी मैच के रुख बदल देलस। ऊ 68 गेना पs नाबाद 135 रन ठोक देलें, जवनामे 10 चौका आ 10 छक्का सामिल रहे। उनका दम पs टीम 20 ओवर में दू विकेट पs 242 रन बनवलस। जवाब में दिल्ली कैपिटल्स के टीम 20 ओवर में नव विकेट पs 195 रन बना सकल।
Read Also: Politics : कांग्रेस प्रमुख के खिलाफ ECI पहुंचल BJP, PM मोदी पs बयान से जुड़ल बा विवाद
