JP यूनिवर्सिटी के कॉलेज में स्टूडेंट्स के एंट्री रही बैन: 12वीं आ 10वीं के परीक्षा के लेके आदेश जारी, ऑनलाइन चली क्लास
बिहार विद्यालय परीक्षा समिति कावर से 12वीं के परीक्षा लिहल जा रहल बा। एह दौरान जयप्रकाश विश्वविद्यालय आ एकरा अंगीभूत महाविद्यालय मे शिक्षण के काम पूरा तरीका से बाधित रही। जयप्रकाश विश्वविद्यालय के कुलसचिव विज्ञप्ति जारी करत कहलें कि सीवान, छपरा आ गोपालगंज के सब अंगीभूत महाविद्यालयन मे शिक्षण कार्य बंद रखे के निरदेस दिहल गइल बा।
संगही एह महाविद्यालयन मे विद्यार्थियन के प्रवेश पs पूरा तरे से रोक रही। 12वीं के परीक्षा समाप्त होखतही 10 वीं के परीक्षा सुरू होई। ओह दौरान महाविद्यालय परिसर मे विद्यार्थियन के प्रवेश पs रोक रही।
कर्मचारियन के मिली प्रवेश
कुल सचिव बतवलें कि एह दौरान महाविद्यालय आ विश्वविद्यालय के कार्यालय खुलल रही। जेमे प्रशासनिक आ आउर काम जारी रही। परीक्षा के दौरान महाविद्यालय में परीक्षार्थी आ वीक्षक के अलावा महाविद्यालय के कर्मचारियन के प्रवेश मिली।
ऑनलाइन चली क्लास
जेतना दिन तक 10वीं आ 12वीं के परीक्षा चली, ओतने दिन तक ऑनलाइन क्लास चलावे के निरदेस दिहल गइल बा। सब कॉलेज के प्रोफेसरन के अलग-अलग क्लास खातिर ऑनलाइन क्लास लेवे के होई। एह दौरान सब विद्यार्थियन के मोबाईल नंबर पs लिंक भेजल जाई। जवना पs रजिस्टर कs के ऑनलाइन क्लास कइल जा सकत बा। विद्यार्थियन के ऑनलाइन क्लास मे न्यूनतम 75 प्रतिशत क्लास लेवही के होई।
Comments are closed.