मुंबई। बॉलीवुड के दिग्गज अभिनेता आ सबका दिलन के हीरो धर्मेंद्र अब ना रहलें। 89 बरिस के उमिर में उनकर निधन हो गइल। कुछ दिन पहिले धर्मेंद्र कइयन दिनन से अस्पताल में भर्ती रहलें, जहां दिन-रात इलाज चलत रहे। उनका निधन के तब खबर चल गइल रहे जवन बाद में गलत साबित भइल रहे।
सलमान-शाहरुख पहुंचल रहे लोग हॉस्पिटल
जब धर्मेंद्र के हालत गंभीर भइल, तs बॉलीवुड के कइयन गो बड़ सितारा उनका से मिले पहुंचल- सलमान खान, शाहरुख खान, गोविंदा आ अमीषा पटेल हॉस्पिटल पहुंच के उनका से भेंट कइल लोग। धर्मेंद्र हमेसा से अपना सादगी आ मिलनसार स्वभाव से सबकर दिले जीत लेत रहस।
1960 में कइले रहलें बॉलीवुड डेब्यू
धर्मेंद्र के पूरा नाम धर्मेंद्र केवल कृष्ण देओल रहे। ऊ 8 दिसंबर 1935 के पंजाब के नसरानी गांव में जनमल रहस। 1960 में ऊ फिल्म ‘दिल भी तेरा हम भी तेरे’ से अपना करिअर के सुरुआत कइले रहस। 1961 में ‘बॉय फ्रेंड’ में सपोर्टिंग रोल कइले, आ धीरे-धीरे बॉलीवुड के ही-मैन कहइलें।
धर्मेंद्र के परिवार
धर्मेंद्र के दूगो बियाह भइल। पहिला पत्नी प्रकाश कौर से चार गो लइका- सनी देओल, बॉबी देओल, विजेता देओल आ अजीता देओल।
1980 में ऊ बिना तलाक के हेमा मालिनी से शादी कइलें आ इस्लाम धर्म अपनवलें। हेमा से दूगो बेटी- ईशा देओल आ अहाना देओल।
धर्मेंद्र के हिट फिल्मन के लिस्ट
धर्मेंद्र आपन 65 बरिस के फिल्मी करियर में कइयन गो हिट आ ब्लॉकबस्टर फिल्म कइले रहलें, जवना में शोले (1975), चुपके-चुपके (1975), सीता और गीता (1972), धरमवीर (1977), फूल और पत्थर (1966), जुगनू (1973) आ यादों की बारात (1973) सामिल बा।हाले में ऊ रॉकी आ रानी के प्रेम कहानी (2023) आ तेरी बातों में ऐसा उलझा जिया (2024) में नजर आइल रहलें।
