पूर्वी दिल्ली के शकरपुर थाना इलाका में अवैध तरीका से रहे वाला एगो चीनी नागरिक के गिरफ्तार कs लेले बा। आरोपी के पहचान 40 साल के यू जिया के रूप में भइल बा। पुलिस के मुताबिक ऊ एचआईवी संक्रमित बा। दिल्ली के एगो निजी अस्पताल में ओकर इलाज चलता। एकरा चलते ऊ इहाँ गैरकानूनी तरीका से रहत रहे। आरोपी के बुधवार के अदालत में पेश कs के जेल भेज दिहल गइल।
दिल्ली पुलिस के एगो अधिकारी बतवले कि शकरपुर थाना के इलाका के सुंदर प्रखंड के गली नंबर एक में कुकुर के लेके शुरू भइल झगड़ा के जानकारी मिलल। मामला के जांच करत घरी पुलिस के पता चलल कि इहाँ एगो चीनी नागरिक गैरकानूनी तरीका से रहत बा। एकरा चलते पुलिस ओकरा के गिरफ्तार कs लेलस।
पूछताछ के दौरान आरोपी खुलासा कइलख कि ऊ साल 2020 में इलाज खातीर भारत आइल रहे, काहेंकी ऊ एचआईवी संक्रमित बा। दिल्ली के एगो निजी अस्पताल में ओकर इलाज चलता, बाकी वीजा खतम होखला के बाद भी ऊ इहाँ रह के इलाज करावत रहले। पुलिस आरोपी के लगे से चीनी पासपोर्ट भी बरामद कs लेले बिया।
