आजमगढ़। मुख्यमंत्री योगी आदित्यनाथ सनिचर के आजमगढ़ दौरा पs समाजवादी पार्टी के अध्यक्ष अखिलेश यादव के बेटी के खिलाफ कइल गइल आपत्तिजनक टिप्पणी के ममिला पs बयान देलें। ऊ कहलें कि बेटी सब केहू के होले आ बेटी के खिलाफ कवनो अपमानजनक टिप्पणी बर्दाश्त ना कइल जाई।
सीएम योगी कहलें, “हम पिछला कुछ दिन से देखत रहनी। समाजवादी पार्टी के अध्यक्ष अखिलेश यादव के बेटी के खिलाफ कुछ लोग गलत टिप्पणी कइले रहे। जइसही ई बात हमरा जानकारी में आइल, हम पुलिस से कहनी कि एह ममिला में FIR दर्ज करावल जाये। बेटी के खिलाफ कवनो अपमानजनक बात स्वीकार ना होई। बेटी, बेटी होले आ हमनी के संस्कार में ई बात सिखावल गइल बा।”
ई बात सीएम योगी आदित्यनाथ आजमगढ़ विश्वविद्यालय परिसर में आयोजित जनसभा के संबोधित करत कहलें।
‘चेला-चपाटियन के तनिका सीख दे दीं’
सीएम योगी कहलें कि कहल जाला कि गांव के बेटी सब केहू के बेटी होले आ गांव के बहिन सब केहू के बहिन होले। हमनी के कबो कवनो भेदभाव नइखी कइले सs।
ऊ अखिलेश यादव पs निशाना साधत कहलें, “अखिलेश जी, दूसर लोगन के उपदेश देत बाड़ें तs अपना चेले-चपाटियन के सीख देस कि आपन भाषा पs संयम रखे लागे। दूसरा के बारे में टिप्पणी करे से पहिले खुद सोचल जरूरी बा।”
ऊ कहलें कि कुछ लोग बहिन-बेटी, बुजुर्ग, दिवंगत लोग आ वरिष्ठ नेता लोग के बारे में अइसन भाषा के इस्तेमाल करेला, जवना में सुधार के जरूरत बा। सीएम योगी कहलें कि अच्छा होई कि ऊ लोग के समझावल जावs, ना त हमनी के जिम्मा दिहल जावs, हम ठीक से समझा देम।
‘बेटी के पढ़ाई आ बियाह खातिर योजना बा’
मुख्यमंत्री योगी आदित्यनाथ कहलें कि आज सरकार के लगे बेटी के शिक्षा आ बेटी के बियाह खातिर योजना बा। ऊ सवाल उठवलें कि 2017 आ 2014 से पहिले ई सब काम काहे ना भइल?
ऊ कहलें कि एक्सप्रेस-वे, विश्वविद्यालय आ नर्सिंग कॉलेज पहिले काहे ना बन पावल? एकर कारण रहे कि काम करे के इच्छाशक्ति ना रहे। नवहन के नौकरी काहे ना मिल पावल आ कनेक्टिविटी बेहतर काहे ना भइल।
सीएम योगी कहलें कि अब गोरखपुर जाये में आसपास के लोग के करीब एक घंटा लागेला, वाराणसी डेढ़ से पवने दू घंटा में पहुंचल जा सकेला आ लखनऊ करीब ढाई घंटा में पहुंचल जा रहल बा।
‘बिना भेदभाव के योजना के लाभ मिली’
सीएम योगी कहलें कि सरकार विकास के गति बढ़ावे के काम कइले बिया। हर गरीब के माथा ढके खातिर घर, हर गरीब परिवार में शौचालय, हर बेटी के सुरक्षा आ बेयपारी के सुरक्षा के बेवस्था कइल गइल बा।
ऊ कहलें कि सरकार बिना भेदभाव के सुरक्षा दी आ सरकारी योजना के लाभ सब केहू के पहुंचावल जाई।
हालांकि ऊ चेतावनी देत कहलें कि जदि केहू गरीब के जमीन कब्जा करे, बेटी के सुरक्षा में सेंध लगावे भा बेयपारी के संगे जबरदस्ती करे के कोसिस करी, तs ओकरा खिलाफ सख्त कार्रवाई कइल जाई।
