लखनऊ। उत्तर प्रदेश कांग्रेस अध्यक्ष अजय राय के WhatsApp अकाउंट पs बैन लाग गइल बा। अजय राय एह बात के जानकारी सोशल मीडिया प्लेटफॉर्म फेसबुक पs पोस्ट के के देलें। अकाउंट बंद होखला के बाद ऊ भाजपा सरकार पs निशाना साधत कहलें कि देस में तानाशाही चरम पs पहुंच गइल बा।
अजय राय कहलें- आवाज उठावे के मिल रहल बा सजा
अजय राय आरोप लगावत कहलें कि भाजपा सरकार के नीति, कथित घोटाला आ नाकामी के खिलाफ लगातार आवाज उठावे के चलते उनका के निशाना बनावल जा रहल बा। उनका मोताबिक, राजनीतिक दबाव के चलते उनकर WhatsApp अकाउंट बैन कइल गइल बा।
कांग्रेस प्रदेश अध्यक्ष सोशल मीडिया पोस्ट में कहलें कि अकाउंट बैन होखे के बाद समीक्षा माने रिव्यू करे के अधिकार तक उनका से छीन लिहल गइल बा।
‘भाजपा चाहे जेतना डिजिटल हथकंडा अपना ले’
अजय राय कहलें कि भाजपा चाहे जेतना डिजिटल हथकंडा अपना ले, कांग्रेस जनता के मुद्दा के लड़ाई सड़क से संसद तक जारी रखी।
उनकर कहनाम बा कि विपक्ष के आवाज दबावे के कोसिस लोकतांत्रिक बेवस्था खातिर चिंता के विषय बा। अजय राय एह कार्रवाई के राजनीतिक दबाव से जोड़त WhatsApp आ Meta से अपना अकाउंट के तत्काल बहाल करे के मांग कइलें।
WhatsApp आ Meta से अकाउंट बहाल करे के मांग
अजय राय अपना पोस्ट में WhatsApp Team आ Meta से अपील कइलें कि उनकर बंद अकाउंट के जल्द से जल्द बहाल कइल जावs। हालांकि, WhatsApp भा Meta के ओर से अकाउंट बंद कइल जावs के कारण के संबंध में तत्काल कवनो आधिकारिक प्रतिक्रिया सामने नइखे आइल।
