इलाज के बहाना मासूम बच्चा के साथ दरिंदगी करे वाला 74 साल के ढोंगी बाबा के उम्रकैद, दिल्ली के अदालत के आदेश

नई दिल्ली। अंधविश्वास के नाम पर 8 साल के बच्ची के साथ यौन शोषण करे वाला 74 साल के एगो ढोंगी बाबा के अदालत आखिरी सांस तक जेल में रहे के सजा सुनवले बिया। कोर्ट कहलस कि अइसन बाबन पर लोगन के अन्हविश्वास अक्सर धोखा में बदल जाला आ अइसन घटना इंसानियत के अस्तित्व पर ही सवाल खड़ा करेला।

मामिला उत्तम नगर के बा। सरकारी वकील चंदरजीत यादव के मुताबिक, आरोपी असगर वाखो अपना के ‘फकीर बाबा’ बतावत रहे। 9 फरवरी 2025 के ऊ बच्ची के घर ई कहके पहुंचल कि ऊ ओकर ब्रेन सिस्ट के इलाज कर सकेला, जवना के चलते बच्ची के दौरा पड़त रहे।

झाड़-फूंक के बहाना बनाके दुष्कर्म

आरोपी झाड़-फूंक के बहाना बनवलस आ बच्ची के माई से दीवार के ओर मुंह करके खड़ा होखे के कहलस। एकरा बाद ऊ बच्ची के साथ दरिंदगी कइलस। पूरा घटना घर में लागल सीसीटीवी कैमरा में कैद हो गइल, जेकरा बच्ची के मामा देख लिहलें। मामा तुरंत बच्ची के माई के एह बारे में बतवलें आ बच्ची से पूछताछ कइल गइल।

फॉरेंसिक जांच में मिलल 13 वीडियो फाइल

ओही दिन एफआईआर दर्ज कइल गइल। फॉरेंसिक जांच में आरोपी के लगे से अइसने 13 गो वीडियो फाइल मिलल। एडिशनल सेशन जज वैभव मेहता अपना फैसला में कहलें कि घटना के बाद आरोपी सबूत मेटावे के कोशिश में बच्ची के माई से ओकर कपड़ा तुरंत धुलवा दिहलस आ बच्ची के ठंडा पानी से नहवावे के कहलस।

एहसे पता चलेला कि ई ओकर पहिला अपराध ना हो सकेला। कोर्ट आरोपी के पॉक्सो एक्ट के धारा 6 के तहत उम्रकैद आ धारा 10 के तहत 7 साल के सजा सुनवले बिया। एकरा साथही पीड़िता के 15 लाख रुपिया मुआवजा देवे के आदेश भी दिहले बिया।