Jalna construction Workers died महाराष्ट्र के जालना में एगो बड़ हादसा सामने आइल बा। इहां, सनीचर के एगो निर्माण स्थल पs टिप्पर ट्रक द्वारा उनकर अस्थायी शेड पs रेत उतरला के दौरान पांच मजदूरन के मौत हो गइल, जेमे एगो नाबालिग सामिल बा।
शेड के नीचे सूतल रहे लो मजदूर, तबे लाद देलस रेत
अधिकारी के अनुसार, घटना जाफराबाद तहसील के पासोडी-चंदोल में एगो पुल परियोजना स्थल पs भोर में भइल। ऊ बतवलें कि मजदूर साइट पs एगो अस्थायी शेड में सूतल रहस, तबे रेत से लदल एगो टिप्पर आइल आ ट्रक चालक उनकर मवजूदगी से अनजान होके शेड पs सामग्री उतार देलस, जवना से ऊ दब गइलें।
ट्रक चालक पs ममिला दर्ज
सूत्रों के अनुसार, रेत के भार से शेड ढह गइल आ पांच मजदूरन के मौत हो गइल। हादसा के बाद ट्रक चालक मवका से भाग गइल। अधिकारी बतवलें कि मलबा से एगो लईकी आ एगो महिला के बचावल गइल बा। ऊ बतवलें कि ममिला दर्ज कs लिहल गइल बा आ चालक के पता लगावे के प्रयास जारी बा।
मृतकन के भइल पहचान
मृतकन के पहचान सिल्लोड तहसील के गोलेगांव निवासी गणेश धनवाई (60) आ उनकर बेटा भूषण धनवाई (16) आ जाफराबाद तहसील के पद्मावती निवासी सुनील सपकाल (20) के रूप में भइल बा। ऊ कहलें कि आउर दु पीड़ितन के पहचान अभी नइखे हो पाइल।
