UP Budget : सबका के साधे पs काम, सियासी एजेंडन के उड़ान, 24 के मजबूती पs धेयान

वित्त मंत्री ने बजट के जरिए सभ लोगन  के संतुष्ट करे के कोशिस कइले बाड़ें । सरकार एकरा खातिर बुनियादी ढांचन के विकास पs भईल  कामन के आधार बनावल गईल। युवा  लोगन  के टेबलेट, स्मार्टफोन देबे  खातिर बजट में प्रावधान, गन्ना किसानन  के कईल  गईल भुगतान के संगे ग्रामीण युवा लोगन  खातिर  एग्रीटेक स्टार्ट अप खातिर बजट प्रावधान, मोटका अनाजन के खेती, प्राकृतिक खेती, जैव ऊर्जा, हरित ऊर्जा  खातिर  प्रोत्साहन के बजट प्रावधान, कल्याण कारी योजनन खातिर धन आवंटन, बन रहल  एक्सप्रेस वे के निर्माणन में विकास आ ओहनी  के पहुंच बढ़ावे  खातिर कईल जा रहल  जइसन कामन आ गांवन के शहरी सुविधा से संपन्न करे  के संकल्पन से सबका  के संतुष्ट करे के प्रयास कइके सियासी संतुलन साधे के प्रयास भईल  बा  ।

संस्कृत विद्यालयन आ संस्कृत पढ़े वालन  छात्रन  आ  धार्मिक जगहन के विकास खातिर अउरी अधिका धन के बेवस्था के  घोषणा से विरासत के संरक्षण आ प्रोत्साहन के नीति पs दृढ़ता से काम करत रहे के संकल्प देखाई के एजेंडन के साधे के कोसिस कईल गईल बा । जे तरे पहिलका  अनुपूरक बजट ले आके  कुल्ह सरकार अपना एजेंडन  पs काम करत रहल बाड़ी सs ,  ओकरा  के  देखतs  ई कहल जा सकत बा  कि  2024 के लोकसभा चुनाव से पहिले ले आवल गईल  अनुपूरक बजटो के जरिये  सियासी एजेंडन के साधल  गईल बा  भा आगहूँ एजेंडन के साधल जाई  ।

जवना अंदाज में प्रयागराज में आयोजित होखे वाला महाकुंभ के तईयारियन खातिर बजट, नैमिषारण्य में वेद विज्ञान अध्ययन केंद्र, प्रयागराज में भजन संध्या स्थल के निर्माण जइसन घोषणन से सनातन सरोकारन पs सरकार के समर्पण के  संदेश देले बिया , उ हिंदुत्व के एजेंडा को साधत लउकल ।  हालांकि, मदरसन के आधुनिकीकरण तथा धार्मिक शिक्षा के अलावा हिंदी, अंग्रेजी, विज्ञान, गणित पढ़े में रुचि लेबे  वाला छात्रन  खातिर  छात्रवृत्ति से लेके अउरी दोसर कुल्ह सुविधन में  बढ़ोतरी से सबकर साथ, सबकर विकास, सबकर विश्वास के संदेसो के मजबूत करत इ बतावे के कोशिस कइल गईल  बा कि योगी सरकार मुसलमान समुदाय के दुश्मन नईखे । बशर्ते उ लोग अपना आस्था के संगे देश आ प्रदेश के तरक्की में कदम से कदम मिलाई  के चले खातिर तइयार होखसु ।