‘अस्वीकार्य’, काला सागर में रूसी हमला में घायल भइल भारतीय नाविक के लेके भारत के तीखी प्रतिक्रिया

डिजिटल डेस्क, कीव। रोमानिया के समुद्री सीमा के बाहर काला सागर में तुर्की के एगो सिविलियन कार्गो जहाज प रूसी ड्रोन हमला में कम से कम दू गो क्रू मेंबर के मउत हो गइल, जबकि एगो भारतीय समेत कुछ अउरी लोग घायल हो गइल हवे। एह मामला प भारत के प्रतिक्रिया सामने आइल बा।

रोमानिया में भारतीय दूतावास एक्स प एगो पोस्ट में बतवलस कि क्रू मेंबर में तीन गो भारतीय नागरिक शामिल रहलें। ड्रोन हमला के चलते जहाज में आग लाग गइल, जवना में तीन भारतीयन में से एगो घायल हो गइल। उनकर इलाज चल रहल बा।

भारतीय दूतावास का कहलस?

पोस्ट में लिखल गइल, “हमनी के आज ब्लैक सी में कमर्शियल जहाज MV ROYAD MAMMADOV प भइल हमला के बारे में जानकारी मिलल बा। शुरुआती जानकारी के मुताबिक, एह घटना में दू गो लोग (विदेशी नागरिक) के मउत हो गइल बा, जबकि कुछ क्रू मेंबर घायल भइल बाड़ें आ रोमानिया में उनकर इलाज चल रहल बा। साथही ईहो बतावल गइल बा कि क्रू मेंबर में तीन गो भारतीय नागरिक शामिल बाड़ें।”

पोस्ट में आगे कहल गइल, “मिशन भारतीय नागरिकन के सुरक्षा आ भलाई के बारे में अउरी जानकारी जुटावे खातिर संबंधित अधिकारियन के लगातार संपर्क में बा।”

‘भारतीय नागरिकन के सेहत ठीक’

दूतावास कहलस कि भारतीय राजदूत मनोज महापात्रा कार्गो जहाज प मौजूद भारतीय नागरिकन से बात कइलें आ पुष्टि कइलें कि तीनों के सेहत ठीक बा। मिशन कहलस, “राजदूत मनोज महापात्रा कॉन्स्टैंटा काउंटी अस्पताल में इलाज करा रहल तीन गो भारतीय नागरिकन से बात कइलें। ऊ अस्पताल के मुख्य डॉक्टर से बात कइलें, जे पुष्टि कइलें कि तीनों के सेहत बढ़िया बा। राजदूत उनकर के हर संभव मदद आ सहयोग के भरोसा दिहलें बा|”

मिशन कहलस कि ऊ घायल नाविक के हाल-चाल जाने खातिर अस्पताल के अधिकारियन के संपर्क में बा आ भारतीय क्रू सदस्यन के भलाई आ सेहत खातिर हर संभव मदद दे रहल बा।

रूसी हमला प भारत का कहलस?

भारत कार्गो जहाज प रूसी हमला के खबर पर प्रतिक्रिया देत कहलस कि ई आक्रामकता पूरा तरह से अस्वीकार्य बा। विदेश मंत्री एस. जयशंकर कहलें कि भारत खाली वकालत करे तक सीमित ना रहके, हाल के महीना में कीव आ मॉस्को दुनो से बातचीत कइ के यूक्रेन संकट के समाधान के आपन कोशिश तेज कइले बा।

जयशंकर कहलें, “काला सागर से लेके खाड़ी क्षेत्र तक आम नागरिकन के जहाजन पर हमला पूरा तरह से अस्वीकार्य बा। यूएन में गतिरोध बनल बा आ कुछ देश एकर सुधार के विरोध कर रहल बाड़ें। हमनी के मानना बा कि रूस-यूक्रेन विवाद के समाधान के रास्ता बातचीत आ कूटनीति ही ह।”

जेलेंस्की का कहलें?

मरे वाला लोगन के राष्ट्रीयता के बारे में अभीन तुरंत जानकारी ना मिल पावल बा। यूक्रेन के राष्ट्रपति वोलोदिमीर जेलेंस्की के मुताबिक, जब रूसी हमला भइल, तब जहाज प अजरबैजानी आ भारतीय नागरिक सवार रहलें।

हमला के बाद ऊ कहलें, “फिलहाल, दुर्भाग्य से हमनी के पता चलल बा कि जहाज के कप्तान के मउत हो गइल बा। हमनि के संवेदना। एगो अउरी व्यक्ति के का भइल, एकर जानकारी अभीन जुटावल जा रहल बा।” जेलेंस्की आगे कहलें कि क्रू के 11 सदस्यन के बचा लिहल गइल, जवना में से एगो घायल बा।

ऊ आगे कहलें कि यूक्रेन बार-बार स्थिति के शांत करे आ काला सागर में सुरक्षा सुनिश्चित करे खातिर ठोस कदम उठावे के प्रस्ताव दिहले बा। ऊ पोस्ट कइलें, “ग्लोबल फूड सिक्योरिटी के बहाल करे खातिर दबाव बनावे के जरूरत बा आ जे एहमें सच्चा दिल से रुचि रखेला, ओकरा के मदद करे के चाहीं।”