रामलला के जन्मभूमि छव लेन सड़क से जोड़ल जाई। एकरा खातिर वाया अयोध्या, लखनऊ से गोरखपुर तक हाईवे के चौड़ा करे के फैसला कइल गइल बा। अभी ई रोड फोरलेन बा। एह सड़क के चौड़ा करे खातिर जल्दिये भारतीय राष्ट्रीय राजमार्ग प्राधिकरण (एनएचएआई) टेंडर आमंत्रित करी।
अयोध्या में रामलला के मंदिर के निर्माण पूरा होखला प इहां पूरा संसार से आवे वाला श्रद्धालुअन के संख्या में बढ़न्ती होखल तय बा। एकरा के धेयान में राखत ढांचागत सुविधा विकसित कइल जा रहल बा। एही के तहत लखनऊ-अयोध्या-गोरखपुर हाईवे के छव लेन तक चौड़ा करे के योजना बना लिहल गइल बा।
लखनऊ से अयोध्या के बीच हाईवे से सटल गांव आ कस्बा बा। एहिसे जहां सड़क के चौड़ा करे लायक जमीन उपलब्ध ना होई, उहां फ्लाईओवर बनावल जाई। लखनऊ से गोरखपुर तक हाईवे के लंबाई 269 किमी बा। समूचा हाईवे प 40 अइसन स्थान चिह्नित कइल गइल बा, जहां फ्लाईओवर बनावल जाई।
एनएचएआई सूत्रन के मोताबिक, केंद्रीय सड़क परिवहन आ राजमार्ग मंत्रालय एह परियोजना के सैद्धांतिक मंजूरी दे देले बा। जल्दिये डीपीआर (विस्तृत प्रोजेक्ट रिपोर्ट) तइयार हो जाई। लागत आ आउर विशिष्टियन के आकलन होखला के बाद टेंडर आमंत्रित कइल जाई।
