Priyanka Chopra: एक बेर फेर देस के गौरव बनली देसी गर्ल, प्रियंका के मिलल ‘एकेडमी ऑफ मोशन पिक्चर’ के सदस्यता
ग्लोबल आइकन प्रियंका चोपड़ा एकेडमी ऑफ मोशन पिक्चर्स आर्ट्स एंड साइंसेज के एक्टर्स ब्रांच के कार्यकारी समिति में सामिल हो गइल बाड़ी।
बॉलीवुड के गलियन से निकल के ग्लोबल आइकन के तौर पs पहचान बनावे वाली अभिनेत्री प्रियंका चोपड़ा आइल दिन कवनो ना कवनो वजह से सुर्खियन में बनल रहेली। अभिनेत्री जहां एक तरफ अपना आवे बाला वेब सीरीज ‘सिटाडेल’ के लेके चरचा में बनल बाड़ी, ओहिजा अब एगो अइसन खबर आ रहल बा जवना के सुनके हर एक भारतीय के मन में प्रियंका खातिर मान आउर बढ़ जाई। असल में, देसी गर्ल एक बेर फेर कुछ अइसन कs देखवले बाड़ी, जवना से भारत के गौरव आ सम्मान बढ़ गइल बा। खबर बा कि प्रियंका चोपड़ा ‘एकेडमी ऑफ मोशन पिक्चर आर्ट्स एंड साइंसेस’ के सदस्यन में सामिल हो गइल बाड़ी।
प्रियंका चोपड़ा एगो अइसन अदाकारा हई, जे ना खाली अपना अद्भुत अभिनय कौशल खातिर जानल जाली, बलुक एक दूसरा के मदद करे वाली व्यक्ति, बिजनेसवुमेन आ लेखिको हई। सभका बीच पॉपुलर प्रियंका चोपड़ा अपना करियर के संगे-संगे आउर बहुत अइसन चीजन के माध्यम से लोगन से जुड़ल बाड़ी, जवना के वजह से उनकर प्रसिद्धि दिन-ब-दिन आउर बढ़त जा रहल बा। आपन आवे वाला वेब सीरीज ‘सिटाडेल’ में जबर्दस्त एक्शन खातिर सुर्खियन के बटोरे वाली प्रियंका चोपड़ा ‘एकेडमी ऑफ मोशन पिक्चर आर्ट्स एंड साइंसेस’ के सदस्य बन गइल बाड़ी, जवना खातिर उनका मेंबरशिप बोर्ड ऑफ गवर्नर्स से इन्विटेशन मिलल रहे।
‘एकेडमी ऑफ मोशन पिक्चर आर्ट्स एंड साइंसेस’ के मेंबर बने खातिर इन्विटेशन के संगे-संगे ऑस्कर नॉमिनेशनो के जरूरत पड़ेला। खास बात ई बा कि प्रियंका चोपड़ा अभिनीत फिल्म ‘वाइट टाइगर’ के ऑस्कर में नॉमिनेशन मिलल रहे। फिल्म में अभिनय कइला के संगे-संगे प्रियंका एकरा के प्रोड्यूसो कइले रहली। प्रियंका के एकेडमी ऑफ मोशन पिक्चर आर्ट्स एंड साइंसेस के मेंबर बनल भारत खातिर गर्व के बात बा।
प्रियंका चोपड़ा के वर्कफ्रंट के बात करीं तs अभिनेत्री जल्दिये अमेजन प्राइम वीडियो के एक्शन थ्रिलर वेब सीरीज ‘सिटाडेल’ में काम करत लउकिहे। एह सीरीज में एक बेर फेर प्रियंका के एक्शन अवतार उनका प्रशंसकन खातिर ट्रीट लेके आवे वाला बा। सभे उनका सीरीज के बेसब्री से इंतजार कर रहल बा। एकरा अलावे प्रियंका फिल्म ‘लव एगेन’ में मुख्य भूमिका निभावत नजर अइहें। हॉलीवुड प्रोजेक्ट्स के संगे-संगे अभिनेत्री के लगे फरहान अख्तर के फिल्म ‘जी ले जरा’ बा, जवना में उनका संगे आलिया भट्ट आ कटरीना कैफ स्क्रीन शेयर करीं लो। फिल्म के शूटिंग जल्दिये सुरू होखे वाला बा।
Comments are closed.