नई दिल्ली। प्रधानमंत्री नरेंद्र मोदी आज राजधानी दिल्ली में एगो बहुते महत्वपूर्ण बैठक के अगुवाई करिहें। ई बैठक सबेरे 11:30 बजे होई, जवना में कैबिनेट कमेटी ऑन सिक्योरिटी (CCS) देस के सुरक्षा से जुड़ल हालात के समीक्षा करी। एकरा से अलग, प्रधानमंत्री संसद में आर्थिक ममिला के कैबिनेट समिति (CCEA) आ कैबिनेट के बैठक में संबोधन करिहें।
राष्ट्रीय सुरक्षा पs खास ध्यान
ई बैठक अइसन समय पs होत बा जब पश्चिम एशिया में चलत संघर्ष के वैश्विक अर्थबेवस्था आ खास कs के भारत पs पड़त असर के आकलन कइल जा रहल बा। प्रधानमंत्री मोदी एकरा से पहिले एक अप्रिल के सुरक्षा संबंधी कैबिनेट समिति के एगो खास बैठक के अगुवाई कs चुकल बाड़ें, जवना में पश्चिम एशिया संकट के संदर्भ में आगे के डेग पs चरचा भइल रहे। सरकारी सूत्रन के मोताबिक, भारत में पर्याप्त कोयला भंडार आ वैकल्पिक आपूर्ति के बेवस्था सुनिश्चित कइल गइल बा, ताकि बिजली आ खाद्य सुरक्षा पs कवनो संकट ना आवे।
पश्चिम एशिया संकट के असर
हाल के महीना में पश्चिम एशिया में बढ़त तनाव के बीच भारत सरकार लगातार इस्थिति पs नजर बनवले बिया। सरकार ई सुनिश्चित करे पs जोर देत बिया कि देस में पेट्रोलियम उत्पाद, एलएनजी/एलपीजी आ बिजली के आपूर्ति में कवनो बाधा ना आवे। एह बैठक में देस के ऊर्जा सुरक्षा आ आम जनता के जरूरत के उपलब्धता पs विस्तार से चरचा होई।
एकरा अलावे बैठक में उर्वरक के उपलब्धता, खरीफ आ रबी सीजन के तइयारी, बिजली उत्पादन खातिर कोयला भंडार के इस्थिति आ किसानन के जरूरत पूरा करे से जुड़ल उपायन के बारीकी से समीक्षा कइल जाई।
Read Also: 18 अप्रिल 2026 के राशिफल
