आंध्र प्रदेश के उपमुख्यमंत्री आ तेलुगु सिनेमा के मशहूर अभिनेता पवन कल्याण अपना निजी जिनगी के एगो बड़ फैसला के चलते चर्चा में आ गइल बाड़ें। पवन कल्याण आ उनकर पत्नी अन्ना कोनिडेला अपना 13 साल पुरान शादीशुदा रिश्ता के खत्म करे के एलान कइले बाड़ी। दुनो के ओर से जारी संयुक्त बयान में कहल गइल बा कि ऊ लोग आपसी समझदारी आ एक-दूसरा के सम्मान करत अलग होखे के फैसला लिहले बा।
पवन कल्याण आ अन्ना के एह फैसला से उनका प्रशंसकन के बीच निराशा आ हैरानी देखे के मिल रहल बा। दुनो के जोड़ी के काफी समय से एक-दूसरा के करीब मानल जात रहल बा। हालांकि, अब दुनो अपना-अपना जिनगी में अलग राह चुने के फैसला कइले बाड़ें।
आपसी सहमति आ सम्मान के साथ अलग होइहें दुनो
पवन कल्याण आ अन्ना कोनिडेला अपना शुभचिंतक, परिवार आ करीबी लोग खातिर एगो संयुक्त बयान जारी कइले। एह बयान में दुनो अपना रिश्ता के खत्म करे के फैसला के जानकारी देत कहलें कि जिनगी के एगो महत्वपूर्ण हिस्सा एक साथ बितवला के बाद अब ऊ लोग आपसी समझ आ सम्मान के साथ अलग होखे जा रहल बा।
बयान में दुनो साफ कइलें कि भले ही अब पति-पत्नी के रूप में उनकर रिश्ता ना रही, बाकिर ऊ लोग एक-दूसरा के अच्छा दोस्त बनल रही। सबसे खास बात ई बा कि दुनो अपना बच्चन के प्रति जिम्मेदार माता-पिता बनल रहीहें।
उनकर कहनाम बा कि बच्चन के खुशी, भविष्य आ बेहतर परवरिश हमेशा दुनो के प्राथमिकता रही। एह फैसला के असर बच्चन पर कम से कम पड़े, एकर पूरा कोशिश कइल जाई।
दुनो के एह बयान से साफ बा कि ऊ लोग अपना निजी रिश्ता के अलग रख के बच्चन के जिम्मेदारी मिलजुल के निभावे के चाहत बा।
निजता के सम्मान करे के कइलें अपील
अलग होखे के एलान के साथे पवन कल्याण आ अन्ना अपना प्रशंसकन आ आम लोग से एगो खास अपील भी कइले बाड़ें। दुनो कहलें कि ई उनकर निजी जिनगी से जुड़ल फैसला बा। एह मुश्किल समय में लोग उनकर स्थिति के समझे आ संवेदनशीलता देखावे।
उहाँ लोग अपना निजता के सम्मान करे के भी अनुरोध कइलें। साथही एह सफर में साथ देवे वाला परिवार, दोस्त आ शुभचिंतकन के धन्यवाद दिहलें।
एह घोषणा के कुछ समय बाद अन्ना कोनिडेला अपना इंस्टाग्राम अकाउंट भी डिलीट कर दिहली। सोशल मीडिया पर एह कदम के लेके तरह-तरह के चर्चा शुरू हो गइल। हालांकि, इंस्टाग्राम अकाउंट हटावे के पीछे के असली वजह के बारे में कवनो आधिकारिक जानकारी सामने नइखे आइल।
सितंबर 2013 में भइल रहे दुनो के बियाह
पवन कल्याण आ अन्ना कोनिडेला के बियाह सितंबर 2013 में भइल रहे। अन्ना मूल रूप से रूस के नागरिक रहली। दुनो के बियाह हैदराबाद के सब-रजिस्ट्रार कार्यालय में स्पेशल मैरिज एक्ट के तहत भइल रहे।
शादी के बाद दुनो के परिवार में दू गो बच्चा के आगमन भइल। बेटी के नाम पोलेना अंजना पवनोवा आ बेटा के नाम मार्क शंकर पवनोविच बा।
पवन कल्याण अपना फिल्मी करियर के साथे-साथे राजनीति में भी सक्रिय रहल बाड़ें। वर्तमान में ऊ आंध्र प्रदेश सरकार में उपमुख्यमंत्री के जिम्मेदारी निभावत बाड़ें। अइसन में उनकर निजी जिनगी से जुड़ल एह फैसला पर राजनीतिक आ फिल्मी दुनो क्षेत्र में चर्चा हो रहल बा।
पवन कल्याण के तीसरा बियाह भी टूटल
पवन कल्याण के निजी जिनगी में ई पहिला बेर नइखे जब उनकर शादीशुदा रिश्ता टूटल होखे। अन्ना कोनिडेला उनका तीसरी पत्नी रहली। एकरा पहिले भी पवन कल्याण के दू गो शादी हो चुकल रहे।
पवन कल्याण के पहिला बियाह साल 1997 में नंदिनी से भइल रहे। हालांकि, दुनो के रिश्ता लंबा समय तक ना चल सकल। करीब दू साल बाद दुनो अलग रहे लागलें। बाद में साल 2008 में दुनो के तलाक हो गइल।
पहिला शादी टूटला के बाद पवन कल्याण अभिनेत्री आ मॉडल रेणु देसाई के साथे रिश्ता में आइलें। दुनो साल 2009 में बियाह कइलें। बाकिर ई रिश्ता भी ज्यादा दिन ना चल सकल आ साल 2011 में दुनो अलग हो गइलें। साल 2012 में कानूनी रूप से तलाक हो गइल।
एकरा बाद पवन कल्याण साल 2013 में रूसी नागरिक अन्ना लीजनेवा से बियाह कइलें, जेकरा बाद ऊ अन्ना कोनिडेला के नाम से जानल गइली। अब एह तीसरा शादी के भी खत्म करे के एलान हो गइल बा।
कुछ दिन पहिले अन्ना दिहले रहली जन्मदिन के बधाई
पवन कल्याण आ अन्ना के अलग होखे के खबर एह वजह से भी चर्चा में बा, काहेकि कुछ समय पहिले तक दुनो के बीच सब कुछ ठीक देखाई देत रहे।
दरअसल, 2 सितंबर के पवन कल्याण अपना 55वां जन्मदिन मनवले रहस। एह मौका पर अन्ना सोशल मीडिया पर पवन कल्याण के साथे एगो तस्वीर साझा कइले रहली।
तस्वीर के साथे ऊ पवन कल्याण के जन्मदिन के बधाई देत उनकर तारीफ कइले रहली। अन्ना लिखले रहली कि आज ऊ अइसन व्यक्ति के जश्न मना रहल बाड़ी, जे लाखों लोग के दिल, विचार आ प्रार्थना में बसल बाड़ें।
No comments yet. Be the first to comment!