गोपालगंज के जिला के टॉप 10 में सामिल कुख्यात अपराधी के गोपालगंज पुलिस गुप्त सूचना के आधार पs सारण से गिरफ्तार कइल गइल। गिरफ्तार बदमाश विक्रम सिंह कुख्यात विजय सिंह गिरोह के सक्रिय सदस्य रहल बा।
एह संदर्भ में पुलिस अधीक्षक स्वर्ण प्रभात बतवलें कि गिरफ्तार अभियुक्त पs कइयन गो आपराधिक ममिला दर्ज बा। ऊ बतवलें कि मार्च महीना में हथुआ ग्रामीण कार्य विभाग प्रमण्डल के ठिकेदार भोरे थाना क्षेत्र के जगतौली गांव निवासी स्व० दीनबंधु दीक्षित के बेटा विजय कुमार दीक्षित विजयीपुर थाना क्षेत्र के अहियापुर से मुसेहरी तक पक्की रोड के निर्माण करा रहल बा। कुटिया गांव में निर्माण के दौरान विक्रम सिंह के विजय कुमार दीक्षित के धमकी देके रंगदारी के मांग कइल गइल। एकरा के लेके विजयीपुर थाना में कांड दर्ज कइल गइल।
दर्ज कांड के बाद जांच सुरू कइल गइल। संगही आरोपी के गिरफ्तारी खातिर हथुआ अनुमंडल पुलिस पदाधिकारी के नेतृत्व में DIU टीम अउर STF संयुक्त छापेमारी कs के सारण जिला के परसा थाना क्षेत्र से विजयीपुर थाना क्षेत्र के निवासी सारूपाई टोला खापे गांव निवासी नन्दकिशोर सिंह के बेटा विक्रम के गिरफ्तार कइल गइल। ऊ बतवलें कि विक्रम सिंह के एगो सहजोगी विशाल साह उर्फ विशाल खटिक के गिरफ्तार कs के न्यायिक हिरासत में भेजल जा चुकल बा। विक्रम सिंह के अउर सहजोगी के तलाश जारी बा। पुलिस अधीक्षक टीम के 5000 रुपिया रिवॉर्ड आ प्रशस्ति पत्र से पुरस्कृत कइलें।
