मंगल ढिल्लों के मउत : कई गो फिलिमन आ टीवी सीरियल में काम करे वाला दिग्गज अभिनेता मंगल ढिल्लों के निधन हो गइल बा। अगर रिपोर्ट पs विश्वास कईल जाए त उ कैंसर से पीड़ित रहले अवुरी उनुकर इलाज चलत रहे।
टीवी सीरियल आ फिलिमन में काम करे वाला अभिनेता मंगल ढिल्लों के निधन हो गइल बा। उ बहुत दिन से कैंसर से जूझत रहले अवुरी उनुकर करीबी दोस्त के कहनाम बा कि उनुका के करीब एक महीना तक लुधियाना के कैंसर अस्पताल में भर्ती करावल गईल, जहां उनुकर इलाज चलत रहे। खबर के मुताबिक उनुकर हालत बहुत गंभीर रहे। बतावल जात बा कि रविवार के इलाज के दौरान उनुकर मउत हो गईल। बॉलीवुड अभिनेता यशपाल शर्मा उनका निधन के पुष्टि कइले बाड़न। उ अपना फेसबुक पोस्ट के माध्यम से बतवले कि मंगल अब हमनी के संगे नईखे। बता दीं कि मंगल रेखा के 1988 के फिलिम खून भरी माँग में कैमियो कइले रहले। बता दी कि 18 जून मंगल जी के जन्मदिन ह।
मंगल ढिल्लों पंजाबी फिल्म इंडस्ट्री में बहुत मशहूर रहले। कई गो पंजाबी फिलिमन में काम कइलें। एतने ना, कई गो फिलिमन के निर्माण आ निर्देशन भी कइले। उ पंजाब के फरीदकोट के निवासी रहले। पंजाब के फरीदकोट जिला के वांडर जटाना गाँव में उनकर जनम सिख परिवार में भइल रहे। पंज ग्रामीण कलां सरकारी स्कूल में चउथा कक्षा तक पढ़ाई कइले। एकरा बाद उ अपना पिता के संगे उत्तर प्रदेश चल गईले। हाई स्कूल पूरा कइला के बाद पंजाब वापस आ गइलन। स्नातक भइला के बाद दिल्ली में रंगमंच में काम कइलें आ 1979 में पंजाब विश्वविद्यालय, चंडीगढ़ में भारतीय रंगमंच विभाग में शामिल भइलें आ 1980 में अभिनय में डिप्लोमा पूरा कइलें।
मंगल ढिल्लों के पहिला ब्रेक 1986 में मिलल रहे
मंगल ढिल्लों के पहिला ब्रेक 1986 में मिलल रहे आ ऊ टीवी सीरियल कथा सागर में काम कइले रहले। बाकिर सबले लोकप्रिय धारावाहिक बुनियाद से उनुका पहचान मिलल। एकरा बाद ऊ किस्मत, द ग्रेट मराठा, मुजरिम हाजिर, रिश्ता मौलाना आजाद, नूरजहां जइसन कई गो टीवी सीरियल में काम कइलें। टीवी में काम करत घरी उनुका फिलिमन के ऑफर भी मिले लागल। इनके पहिला बेर 1988 के फिलिम खून भरी माँग में देखल गइल रहे। एहमें ऊ वकील के भूमिका निभवले। एकरा अलावे ऊ जख्मी औरत, दयावान, आजाद देश के गुलाम, प्यार का देवता, अकेला, दिल तेरा आशिक, दलाल, विश्वात्मा, निशाना जइसन फिलिमन में काम कइले। अधिकतर फिलिमन में ऊ विलेन के किरदार निभवले बाड़न। उनुका के आखिरी बेर साल 2017 के फिल्म तूफान सिंह में देखल गइल रहे।
