बिहार के कुछ जिलन में बहाल भइल इंटरनेट सेवा, पटना में घूमके DGP देखले अग्निपथ पs बवाल के हाल

By Anurag Ranjan On Jun 20, 2022 Last updated Jun 20, 2022

बिहार में अग्निपथ स्कीम के लेके भइल बवाल के हाल देखे सोमार के डीजीपी खुद पटना के सड़कन पs उतर गइले। विवाद फिलहाल तs थमल बा, बाकिर आईबी इनपुट के बाद अपना पुलिस के आउर चुस्त करे खातिर डीजीपी सड़क पs उतर गइले। उनका साथे उनकर पूरा टीम रहे। एने, ADG मुख्यालय जितेंद्र सिहं गंगवार कहले कि बिगड़ल हालात पs लगाम लगावे खातिर सरकार के तरफ से एहतियात के तौर पs राज्य के 20 जिलन में इंटरनेट के सेवा बंद कइल गइल रहे। बाकिर, अब इस्थिति में पहिले से जादे सुधार हो रहल बा। उपद्रवियन के खिलाफ पुलिस के सख्ती के कारण हंगामा शांत हो गइल बा। एकरा के देखत बिहार के कुछ जिलन में इंटरनेट सेवा फेर से बहाल कs दिहल गइल बा।

बिहार में लॉ एंड ऑर्डर के वर्तमान इस्थिति के देखत सोमार के पुलिस मुख्यालय में हाई लेवल मीटिंग भइल। एह मीटिंग के अगुवाई खुद DGP संजीव कुमार सिंघल कइलें. मीटिंग में सभे सीनियर पुलिस अधिकारियन के साथे-साथे बिहार के हर जिला के SSP/SP उपस्थित रहे लो। डीजीपी मीटिंग में हर एगो जिला के वर्तमान इस्थिति के रिपोर्ट लिहल गइल बा। सूत्रन के मानल जाव तs करीब 45 मिनट ले चलल एह रिव्यू मीटिंग में बिहार पुलिस के अधिकारियन के संगही CRPF के अधिकारियो शामिल रहे लो।

बिहार में भइल उपद्रव आ वर्तमान परिस्थितियन के चर्चा करत ADG मुख्यालय जितेंद्र सिंह गंगवार कहले कि हमनी के अभी तक के हालातन के रिव्यू कइले बानी सs। भारत बंद पs पुलिस मुख्यालय के विशेष नजर रहे। पुलिस के ओर से हर जगह लेअर पेट्रोलिंग कइल जाटत रहे। क्यूआरटी के टीम लगातार मूवमेंट पs रहे। संवेदनशील जगहन पs पैरा मिलिट्री फोर्स के कुल 15 कंपनियन के प्रतिनियुक्त कइल गइल रहे। एकरा आलावे BSAP के 35 बटालियन के मोर्चा पs तैनात कइल गइल बा। एकरा साथे-साथे एह सभन के पुलिस मुख्यालय के को-ऑर्डिनेट रहल।

साभार: प्रभात खबर