Gorakhpur : बरिस 2026 के बहुप्रतीक्षित ‘गोरखपुर महोत्सव’ अबकि बेर चम्पा देवी पार्क में आयोजित कइल जाई। महोत्सव के तइयारियन के लेके मंडलायुक्त सभागार में महत्वपूर्ण समीक्षा बैठक भइल, जवना के अध्यक्षता सदर सांसद रवि किशन कइलें। तीन दिन के एह सांस्कृतिक उत्सव 11, 12 आ 13 जनवरी 2026 के आयोजित होई। उद्घाटन पर्यटन मंत्री करिहें, जबकि समापन समारोह के मुख्य अतिथि मुख्यमंत्री योगी आदित्यनाथ होइहें। ऊ महोत्सव के समापन में पुरस्कार वितरण करिहें।
शिल्प मेला 17 जनवरी तक, देसभर के कलाकार होई लोग सामिल
गोरखपुर महोत्सव के संगे आयोजित होखे वाला शिल्प मेला 17 जनवरी 2026 तक चली। एह मेला में स्थानीय कारीगरन के संगे-संगे देसभर के शिल्पकार आ उद्यमी आपन कला, हुनर आ उत्पादन के प्रदर्शन करी लोग। ई मंच स्थानीय कलाकारन आ उद्यमियन खातिर बड़ अवसर साबित होई।
एह कलाकारन के होई भागीदारी आ मनमोहक प्रस्तुति
- एह साल महोत्सव में राष्ट्रीय आ क्षेत्रीय कलाकारन के विशेष प्रस्तुति होई।
- भोजपुरी स्टार पवन सिंह अपना धमाकेदार प्रस्तुति से मंच पs समा बांधी लोग।
- लोकगायिका मैथिली ठाकुर अपना मधुर आवाज से श्रोता लोगन के मंत्रमुग्ध करी लोग।
- स्थानीय कलाकारन के बड़े मंच पs आपन प्रतिभा दिखावे के अवसर मिली।
मुख्य बिंदु
- बैठक में महोत्सव के रूपरेखा आ सब व्यवस्था पs विस्तार से चर्चा कइल गइल
- चम्पा देवी पार्क में मुख्य मंच आ सांस्कृतिक जोन के तइयारी
- आगंतुकन खातिर पार्किंग, प्रवेश आ निकास मार्ग
- सुरक्षा बेवस्था, ट्रैफिक प्लानिंग आ पुलिस तैनाती
- चिकित्सा सुविधा, कंट्रोल रूम के स्थापना
- शिल्प मेला में स्टॉल आवंटन आ निगरानी
सांसद रवि किशन कहलें कि गोरखपुर महोत्सव के अबकि बेर नया ऊंचाई पs ले जाये के लक्ष्य बा। मंडलायुक्त अनिल ढिंगरा आ जिलाधिकारी दीपक मीणा सब विभागन के समयसीमा के भीतर तइयारी पूरा करे के निरदेस देलें।
बैठक में ई रहलें उपस्थित
अनिल ढिंगरा, दीपक मीणा, जीडीए उपाध्यक्ष आनंद वर्धन, जीडीए सचिव पुष्पराज सिंह, एसपी अपराध सुधीर जयसवाल, सीएमओ राजेश झा, एडीएम सिटी अंजनी कुमार सिंह, एसपी ट्रैफिक राजकुमार पांडेय, उप नगर आयुक्त दुर्गेश मिश्रा, उप निदेशक पर्यटन राजेंद्र प्रसाद, सीओ ट्रैफिक विवेक तिवारी, क्षेत्रीय क्रीड़ा अधिकारी आविद हैदर आ आउर अधिकारी।
Read Also: 20 नवंबर 2025 के राशिफल
