उत्तरकाशी भूकंप : उत्तराखंड में आधा रात में जब लोग गहरा नींद में सुतल रहले तs उत्तरकाशी के धरती हिल जाए लागल। आसपास के इलाका में भूकंप के झटका महसूस भईल। लोग डेरा के घर से बहरी निकलल। एकर तीव्रता रिक्टर पैमाना पs 3.1 नापल गइल। हालांकि कवनो जान-माल के नुकसान के खबर नईखे, लेकिन इ भूकंप ओही जगह पs आईल बा, जहां 40 मजदूर ए सुरंग में फंसल बाड़े।
भूकंप के गहराई 5 किलोमीटर रहे अवुरी एकर केंद्र राजधानी देहरादून से करीब 140 किलोमीटर दूर रहे। नेशनल सेंटर फॉर सिस्मोलॉजी सोशल मीडिया प्लेटफॉर्म एक्स पs लिखले बा कि, ‘3.1 तीव्रता के भूकंप, 16-11-2023 के 02:02:10 बजे आईल। एकर अक्षांश 31.04, लंबाई 78.23 आ गहराई 5 किलोमीटर रहल। स्थान- उत्तरकाशी, उत्तराखंड, भारत।”
एक महीना में दूसरका बेर भूकंप आईल
जानकारी देत जिला आपदा प्रबंधन अधिकारी देवेन्द्र पटवाल कहले कि जिला के सभ तहसील से भूकंप के बारे में जानकारी मांगल गईल बा। फिलहाल कवनो जान-माल के नुकसान के खबर नईखे। एकरा से पहिले 3 नवंबर के उत्तरकाशी में भूकंप आईल रहे अवुरी केंद्र नेपाल में रहे। उत्तराखंड के उत्तरकाशी जिला में पिछला 7 महीना में 13 बेर भूकंप आईल बा। भूबिज्ञानी लोग एकरा के एगो बड़हन भूकंप के ट्रेलर मान रहल बा। उत्तराखंड के भूकंप के नजरिया से बहुत संवेदनशील राज्य मानल जाला। एकर कई गो जिला जोन 5 में आवेला, जवना से पता चलेला कि एह जिला में भूकंप के खतरा बा।
खुद उत्तरकाशी में 40 मजदूर फंसल बाड़े
मालूम रहे कि पछिला रविवार के उत्तरकाशी में एगो निर्माणाधीन टनल लैंडस्लाइड के चलते गिर गईल रहे, जवना के भीतर 40 मजदूर फंसल रहले। एह मजदूरन के सुरक्षित बाहर निकाले खातिर लगातार अभियान चलावल जा रहल बा।एह बचाव अभियान में सेना, एनडीआरएफ, एसडीआरएफ के टीम लागल बा।
