क्राउडस्ट्राइक के गड़बड़ी के चलते माइक्रोसॉफ्ट विंडोज कंप्यूटर यूजर के पूरा दुनिया में समस्या के सामना करे के पड़ता। बतावल जाव कि ई का ह?
क्राउडस्ट्राइक के गड़बड़ी के चलते माइक्रोसॉफ्ट विंडोज कंप्यूटर यूजर के पूरा दुनिया में समस्या के सामना करे के पड़ता। एह समस्या के चलते पूरा दुनिया में उड़ान सेवा बंद हो गइल बा। एकरा अलावे एकरा चलते बैंक आ शेयर बाजार के कामकाज पs भी असर पड़ता। समस्या क्राउडस्ट्राइक के अपडेट के बाद शुरू भइल। क्राउडस्ट्राइक ए गलती के कबूल करत कहलस कि ‘हमनी के इंजीनियर ए समस्या के ठीक करे खातीर सक्रिय रूप से काम करतारे आ सपोर्ट टिकट खोले के जरूरत नइखे।’ एकरा अलावे ऊ लोग इहो बतवले बाड़े कि जसही समस्या के समाधान होई तs ऊ लोग एकरा बारे में जानकारी दिहे।
क्राउडस्ट्राइक विंडोज पीसी खातिर एडवांस साइबर सुरक्षा समाधान उपलब्ध करावेला। अलग-अलग रिपोर्ट के मुताबिक, ए आउटेज के पीछे के कारण उनकर मुख्य उत्पाद फाल्कन बा। एकरा में तकनीकी त्रुटि बा। विंडोज सिस्टम के सुरक्षित करे खातिर ई एगो प्रमुख सुरक्षा प्रणाली हs। इहे कारण बा कि पूरा दुनिया के यूजर के आउटेज के सामना करे के पड़ता।
Falcon कइसे काम करेला?
जदी हमनी के क्राउडस्ट्राइक के बारे में तनी अउरी समझ में आ जाईं जा तs ई एगो साइबर सुरक्षा कंपनी हs जवन क्लाउड आधारित एंडपॉइंट प्रोटेक्शन सॉल्यूशन देवेले। इनहन के मुख्य उत्पाद फाल्कन हवे जे नेटवर्क आ एंडपॉइंट पर दुर्भावनापूर्ण फाइल आ व्यवहार के पता लगावे आ रोके खातिर एआई तकनीक के इस्तेमाल करे ला। फाल्कन एंडपॉइंट सुरक्षा कर सकेला चाहे ऊ ऑनलाइन होखे भा ऑफलाइन। क्राउडस्ट्राइक के दावा बा कि ए कंपनी के तकनीक 99% मैलवेयर खतरा के पता लगा सकता, ओकरा से पहिले कि ऊ आपके संगठन चाहे निजी डिवाइस पs असर डाल सके।
आउटेज के चलते ऑस्ट्रेलिया, जापान, भारत आ बाकी देश में कारोबार आ लोग के समस्या के सामना करे के पड़ता। भारत में शेयर बाजार के बहुत खिलाड़ी, फ्लाइट ऑपरेटर आ न्यूज संगठन ए आउटेज के चलते प्रभावित भइले। सोशल मीडिया पs बहुत यूजर अपना स्क्रीन पs ब्लू स्क्रीन ऑफ डेथ (बीएसओडी) एरर से फंसल तस्वीर भी शेयर कइले बाड़े।
