बड़ी खबरें

खबर भोजपुरी Exclusive: 10 साल पुरान फिल्म के होर्डिंग देखि भड़कले पंकज त्रिपाठी, निर्माता के खिलाफ कानूननी कार्रवाई के धमकी

[the_ad_placement id="above-content"]

मुंबई में एह घरी गली चौराहन पs एगो फिल्म ‘आजमगढ़’ के बड़ बड़ होर्डिंग लागल देखल जा सकत बा। होर्डिंग पs पंकज त्रिपाठी के बहुत बड़की गो तस्वीर बा आ उनकर हुलिया आ फिल्म के नाव जोड़ के देखला पs मामला कुछ कुछ चऊंकावे वाला लउकत बा। एकरा बारे में खोज खबर लिहला पs पाता चलल कि पंकज त्रिपाठी एह फिल्म में एगो अईसन मौलवी के किरदार में बाड़े जे नवहन के आतंकवाद के राही देखावत बा। बाकिर, ओहू से बेसी चऊंकावे वाला बात ई बा कि पंकज त्रिपाठी के एह फिल्म के रिलीज के बारे में पते नइखे । फिल्म के निर्देशक कमलेश कुमार मिश्रा बाड़े जे अपना एगो डॉक्यूमेंट्री खातिर राष्ट्रीय फिल्म पुरस्कारो जीत चुकल बाड़े।

आजमगढ़ के नाव जब कबो सोझा आवेला तs पूर्वी उत्तर प्रदेश के एह जिला से जुड़ल तमाम अराजक तत्वन के नाव दिमाग में घूम जाला। मुंबई में लागल एही नाव के फिल्म के होर्डिंग पs ही ई लिखल गइल बा कि एकरा के मास्क टीवी नाव के कवनो अनजान ओटीटी पs रिलीज कईल जा रहल बा। ओटीटी क्रिएटिव हेड संजय भट्ट से एह बारे में जब बात कईल गईल तs उनकर कहनाम रहे कि एह फिल्म के माध्यम से हमनी के ई देखावे के कोशिश कइले बानी जा कि आजमगढ़ के रहे वाला हर युवक आतंकवादी ना होला।एह फिल्म के सीरीज आ फिल्म दूनो रूप में ओटीटी प्लेटफार्म पs रिलीज करे के उनकर योजना बा। संजय भट्ट के दावा बा कि ई फिल्म 2019 में बनल रहे।

आजमगढ़’ में पंकज त्रिपाठी एगो अईसन मौलवी के भूमिका निभवले बाड़े, जे नवहन के आतंकवादी बने खातिर प्रेरित करत बा।एह फिल्म के बारे में संपर्क कईला पs अभिनेता पंकज त्रिपाठी कहत बाड़े, ‘हमरा के बतावाल गईल रहे कि ई एगो शॉर्ट फिल्म बिया आ हम एकरा खातिर बस तीने दिन शूटिंग कइले रहनी। बाकिर फिल्म के निर्माता उनका नाव के इस्तेमाल कइके फिल्म के अइसे प्रचारित कर रहल बाड़े , जईसे फिल्म में हमार लीड भूमिका होखे।’ पंकज त्रिपाठी नइखन चाहत कि फिल्म में उनका नाव के जोड़ के सस्ती लोकप्रियता बटोरल जाए। बातचीत के दउरान एह बातो के खुलासा भईल कि पंकज त्रिपाठी बिना एकहु पइसा लिहले एह फिल्म में काम कइले बाड़े।

निर्देशक कमलेश मिश्रा फ़ोटो:सोशल मीडिया

शॉर्ट फिल्म के बात पs निर्देशक कमलेश कुमार मिश्रा कहत बाड़े, ई शॉर्ट फिल्म ना हs, जब हमनी के एकर शूटिंग शुरू कइले रहनी जा, तब ई 75 मिनट के रहे, बाद में 90 मिनट के हो गईल। एह फिल्म के शूटिंग कई गो जगहन पs भईल बा, एह फिल्म के बनावे में तनी समय लाग गइल। हमनी के साल 2018 में फिल्म के शूटिंग पूरा कई लेले रहनी जा आ एकर सेंसर सर्टिफिकेटो साल 2019 में करा लिआइल रहे । बाकिर फेरू तले कोविड के वजह से फिल्म रिलीज ना हो पावल तs अब ईहे जाई के रिलीज होके जा रहल बिया।

कमलेश मिश्र से बात कईला पs उ कहत बाड़े, पंकज त्रिपाठी आज दुनिया खातिर भलहीं स्टार होखसु बाकिर हमरा खातिर तs उ शुरूए से स्टार रहल बाड़े। एह फिल्म के बनावे में उनकर बहुते बड़हन सहयोग रहल बा।’ ओहिजे, एह फिल्म के बारे में पंकज त्रिपाठी के कहनाम बा कि फिल्म के निर्माता से हमार बातचीत चल रहल बा कि हमरा नावे के फायदा उठाई के फिल्म के प्रचार ना करसु, आ अगर तबो उ नईखन मानतs तs एकरा खिलाफ उ कानूनी कार्रवाई करिहें। उनकर कहनाम बा कि फिल्म में उनकर छोटहन भूमिका बा आ पोस्टर में जवना तरीका से उनका चेहरा के प्रमुखता से देखावल जा रहल बा, उ गलत बा।