बिहार के जमुई जिला में अतवार के वार्डन अवुरी गार्ड के सुतल रही गइले अवुरी हॉस्टल के सभ 55 छात्रा छात्रावास से लापता हो गईली। घटना अतवार के सबेरे स्थानीय कस्तूरबा गांधी बालिका छात्रावास टाइप 4 में भईल। लापता सभे छात्र स्थानीय राज्य प्रायोजित प्लस टू के छात्र हई संs, जे स्कूल के हॉस्टल में पढ़त बाड़ी। अतवार के सबेरे सभे 55 लईकी छात्रा वार्डन अवुरी रात के चौकीदार के सूचना देले बिना हॉस्टल से अपना घरे चल गईली।
सबेरे 3 बजे के करीब जब वार्डन के नींद खुलल त हॉस्टल में एको लईकी मौजूद ना रहे। हालांकि जांच के बाद सोनो चौक से तीन लईकी के वापस हॉस्टल में ले आवल गईल। सबेरे दस बजे ले चकाई से दू गो लइकी के वापस ले आवल गइल। अतवार के सांझ ले एक दर्जन लईकी के वापस ले आवल गइल, बाकी लईकी अबे ले हॉस्टल ना पहुंचल बाड़ी।
छात्रा कुल अव्यवस्था के लगइली आरोप
हॉस्टल में लवटत छात्रा अम्बाटांड़ चकाई के सोनाली कुमारी, खुशबू कुमारी, बरमोरिया के सलोनी किस्कू, धावाटांड़ के रिंकू मुर्मू, पोंझा चकाई के प्रमिता हेम्ब्रम आदि बतवले कि शनिवार के दुपहरिया में ही खाना मिलल बा। रात में खाना ना मिलल। अइसन घटना बार-बार होखत रहे। ए चलते सभ बालिका छात्रा बिना सूचना के हॉस्टल से निकल के अपना-अपना घर में चल गईली। छात्रा लोग स्कूल प्रबंधन आ रसोइया पs खाना बनावे में सहयोग करे के दबाव बनावे के आरोप भी लगवले बाड़ी।
खाना छात्रा लोग द्वारा बनावल जाला
जब तक हमनी के खाना बनावे में सहयोग ना करब जा, तब तक खाना ना पकेला अवुरी हमनी के खाना ना मिलेला। हॉस्टल में सफाई के कवनो व्यवस्था नईखे। एकाउंटेंट ब्रजेश कुमार बतवले कि पछिला तीन महीना से दोकानदार के बकाया ना चुकावल गईल। दुकानदार ओ लोग से बकाया मांगेले। छात्रावास के संचालक सह प्लस टू राज्य संपोषित उच्च विद्यालय सोनो के प्रभारी प्रधानाध्यापक प्रशांत कुमार पs इंटर परीक्षा फार्म भरला के नाम पs वसूली के आरोप लगवले बाड़ी।
ए मामला पs प्रभारी हेडमास्टर प्रशांत कुमार कहले कि खाना के शिकायत सोझा आवता। छात्रा अपने घरे गईल, उ सब लोग के वापस ले आवल जाता। सिस्टम के सुधारे के प्रयास कईल जाई। आवेदन पत्र में नाजायज वसूली के बात गलत बा।
