अभिनेता-राजनेता मिथुन चक्रवर्ती के लेके बड़ चिंताजनक खबर सामने आईल बा। मिथुन चक्रवर्ती के अस्पताल में भर्ती करावल गइल बा। अभिनेता के 10 फरवरी शनिचर के दिने कोलकाता के अपोलो अस्पताल ले जाइल गइल बा। बतावल जात बा कि अभिनेता के हालत ठीक ना रहुवे जवना के बाद ओकरा के अस्पताल ले जाइल गइल। अनुभवी अभिनेता अवुरी भाजपा नेता मिथुन चक्रवर्ती के स्वास्थ्य के बारे में जानला के बाद प्रशंसक में चिंता के माहौल बन गईल बा। अभिनेता के इलाज कोलकाता के अपोलो अस्पताल में हो रहल बा।
मिथुन चक्रवर्ती अस्पताल में भर्ती
मिथुन चक्रवर्ती के उम्र 73 साल बा। बता दीं कि 10 फरवरी शनिचर के सबेरे मिथुन चक्रवर्ती के अचानक छाती में दर्द के संगे-संगे बेचैनी भी महसूस भईल, जवना के बाद उनुका के तुरंत अस्पताल पहुंचावल गईल। फिलहाल उनुकर स्वास्थ्य स्थिर बा। अब कवनो चिंता के बात नइखे। प्रशंसक उनुका ठीक होखे के दुआ करत बाड़े।
मिथुन चक्रवर्ती के पद्म भूषण मिलल बा
दिग्गज अभिनेता मिथुन चक्रवर्ती के हालही में प्रतिष्ठित पद्म भूषण पुरस्कार से सम्मानित कइल गइल। मिथुन के हिंदी सिनेमा में डिस्को डांसर के रूप में भी जानल जाला। आपन अभिनय करियर में ‘परिवार’, मेरा यार मेरा दुश्मन’, ‘बात बन जाये’ आ ‘दीवाना तेरे नाम’ जइसन करीब 350 फिलिमन में काम कइले बाड़न। पिछला साल नवम्बर में टीवी शो ‘सरेगापामा’ के एपिसोड में मिथुन के मुख्य अतिथि के रूप में देखल गइल रहे। कई गो बढ़िया फिलिमन में काम कइले बाड़न। अभिनेता कई गो टीवी शो के जज भी कइले बाड़न।
मिथुन चक्रवर्ती के आवे वाला फिलिम
पिछला 15 दिन से अभिनेता मिथुन कोलकाता में बंगाली फिल्म ‘शास्त्री’ के शूटिंग में व्यस्त रहले। विवेक अग्निहोत्री के फिल्म ‘द कश्मीर फाइल्स’ के बाद मिथुन चक्रवर्ती के आखिरी बेर बंगाली फिलिम ‘काबुलीवाला’ में देखल गइल रहे। फिलिम ‘द कश्मीर फाइल्स’ में रिटायर्ड आईएएस के भूमिका निभावे खातिर उनुका के सर्वश्रेष्ठ सहायक अभिनेता के ‘फिल्मफेयर अवार्ड’ से सम्मानित कइल गइल।
