Nag Panchami 2026 : साल 2026 में नाग पंचमी 17 अगस्त के मनावल जा रहल बा। अबकि बेर नाग पंचमी के दिन सावन सोमारी के खास संजोग बन रहल बा। धार्मिक मान्यता के अनुसार, नाग पंचमी आ सावन सोमारी के ई संजोग भगवान शिव आ नाग देवता के पूजा खातिर बहुते सुभ मानल जाला।
मानल जाला कि एह दिन श्रद्धा आ विधि-विधान से भगवान शिव आ नाग देवता के पूजा करे से सुख-शांति मिलेला। संगही ग्रह दोष आ जिनगी में आवे वाला कइयन तरे के बाधा से राहत मिल सकेला। ज्योतिषीय मान्यता के अनुसार, कुछ खास उपाय कालसर्प दोष के प्रभाव कम करे में सहायक मानल जालें।
चांदी भा तांबा के नाग-नागिन के जोड़ा के पूजा करीं
नाग पंचमी के दिन चांदी भा तांबा से बनल नाग-नागिन के छोट जोड़ ले सकत बानी। धार्मिक मान्यता के अनुसार, एकर कच्चा दूध आ गंगाजल से अभिषेक कs के भगवान शिव आ नाग देवता के पूजा कइल जाला।
पूजा के बाद नाग-नागिन के जोड़ा के विसर्जन करे के परंपरा कुछ जगहन पs बतावल गइल बा। मान्यता बा कि एह उपाय से कालसर्प दोष के प्रभाव कम हो सकेला।
शिवलिंग पs जल, दूध आ तिल चढ़ाईं
नाग पंचमी आ सावन सोमारी के संजोग में भगवान शिव के पूजा के विशेष महत्व मानल जाला। एह दिन तांबा के लोटा में जल, दूध, गंगाजल आ तिल मिलाके शिवलिंग पs अर्पित कइल जा सकेला।
धार्मिक मान्यता के अनुसार, शिवलिंग पs श्रद्धा से जलाभिषेक आ पूजा करे से मन के शांति मिलेला आ भगवान शिव के किरपा प्राप्त होखे के विश्वास बा।
श्री नवनाग स्तोत्र के पाठ करीं
नाग पंचमी के दिन भगवान शिव आ नाग देवता के पूजा के बाद श्री नवनाग स्तोत्र के पाठ करे के परंपरा बतावल गइल बा। मान्यता के अनुसार, श्रद्धा से एकर पाठ कइला से जिनगी के बाधा दूर होखे आ सकारात्मक ऊर्जा मिल सकेला।
जदि रउआ स्तोत्र के पाठ कs रहल बानी, तs पूजा के समय मन के एकाग्र रखीं आ श्रद्धा से पाठ करीं।
जरूरतमंद लोगन के दान करीं
नाग पंचमी के दिन पूजा के बाद जरूरतमंद लोग के काला तिल, अनाज या अपना क्षमता के अनुसार दक्षिणा दान कइल शुभ मानल जाला। धार्मिक मान्यता के अनुसार, दान-पुण्य से सकारात्मकता बढ़ेला आ मन के शांति मिलेला।
नाग पंचमी पs शिव पूजा के बन रहल बा खास संजोग
17 अगस्त 2026 के नाग पंचमी आ सावन सोमारी के संजोग धार्मिक रूप से खास मानल जा रहल बा। एह दिन श्रद्धालु भगवान शिव के जलाभिषेक, नाग देवता के पूजा आ दान-पुण्य कs सकत बा लो।
कालसर्प दोष से जुड़ल उपाय के लेके अलग-अलग ज्योतिषीय मान्यता बा। एकरा से जदि कवनो व्यक्ति अपना कुंडली के आधार पs विशेष उपाय करे के चाहत बा, तs योग्य ज्योतिष विशेषज्ञ से सलाह लिहल बेहतर होई।
